شعر : إيناس زيدان
ناس فى الزحمة نازلة تدور
على اللى يساعد على اللى يقدر
و قلوبها مليانة هموم بس بتضحك مش بتكشر
واثقة فى رب قادر يجبر
بس إنت أستنى و أصـبـر
ربك وعدك فرجه قريب إنت تفكر هو يدبر
رغم الضحك عيون مليانة
بهم و فكر كبير بيحير
و شباب من كتر ماهى مهمومة
لبست توب شيخوخة مبكر
قاعدة و ساكتة فى وقت بتهدر
مليانة يأس و عزم مكسر
فكر مشوش قلب مدشدش
من الظلم و من الحزن اتكدر
قوم أسعى و الله هيسعى
حـاول غـيـر
أهزم يأسك حارب نفسك
أنصر أملك حقق حلمك
أيــوة هـتـقـدر
يلا بقى فك التكشيرة ربك هيجبلك تأشيرة
راح تتعدل راح تـتـيـسر
و مهما همك كان كبير
لازم تعرف ربك أكبر
وسط الزحمة كتير حكايات
فيها الفرح و فيها أهات
ناس فرحها بيقى دموع
و ناس أهاتها ضحك مكركر
و ناس تانية سمحة بشوشة
و المغرورة و اللى بتتكبر
و اللى بياخد و لايوم يدى
و اللى يهادى بمسك و عنبر
فيها فقير بيموت من الجوع
أما التانى غنى مفجوع
فى فلوسه عمال بيبعتر
و اللى وحيد و مالوش أهل
و اللى نهاره و ليله فى جهل
و اللى بيتعلم برا حتى العربى بتاعه مكسر
و اللى يحب فى دية و دية
تضيع وقت يادوب مش اكتر
ناس فى الشتا بتموت من البرد
و اللى يحب يجيب يـتـمـنـظر
وسط الزحمة كتير مشاوير
و ناس تعبت من التدوير
لما بتيجى ترتاح بـتـفـكـر
