بقلم / خالد الترامسي
والله عم نتنياهو دة رجل محترم واللي يقول غير كدة يبقي لمؤاخذة ، فيل من غير زلمومة ، قاعد ياكل محشي وكشري وملوخية حمضانة ، أه عشان يتخن ويربرب ويربي كرش ، أه البلونة إللي بتبقي علي البطن دي ، وشكلها بيبقي بايخ .
طيب الرجل دة رجل ناصح وزي الفل أحنا عرفنا نعمل زي مهو بيعمل ، إحنا شاطرين نفرقع قنابل عشان بعد كدة نقفلها بالضبة والمفتاح ،ولا تقولي سياحة ولا إستثمارات ، إستثمارات إيه في بلد كئيبة كلنا قاعدين مترصدين لبعض ، وتيارات قاعدة تضرب في طيارات وإشي طيارة تقع في الشرم ، وخيبة في إسكندرية ، والله أعلم تيار مين إللي ورا طيارة فرنسا ، وعملية بقت تقرف وتجيب السعال الديكي ، وشكلنا كدة هنفضل نقاكي ، طيب ينفع كدة ، قال والأخر جايين يقولوا نتنياهو وشرمبوخ .
إحنا أساسا شعب فاضي ، وتنبلي أه والله تنبلي ، وبيحب قاعدة المصاطب ، ويفصص فول ، عشان يعمل فول بالرز ، ويتخن ، ويتنفخ ، ويسمن ، والله زي ما بقول ليكو كدة الشعب بتاعنا دا لو معملوش كدة ممكن من كتر الغيظ يطقوا يفرقعوا يموتوا ، أنتوا هتقولوا لي ، دا أنا حافظه .
عموما إللي نتينياهو بيعملو هو الصح والمنطقي واللي كله مفهومية مش مهلبية ولا بابا غنوج ، خليكوا في الكفتة بتاعتكوا ويا رتكوا حتي فالحين في عمايلها ، دا حتا الحمير منجتش منكوا ، كفتة بالحمير ، حووشي بالحمير ، برجر ، طيب الشاورما دخلت في المعادلة ولا ما تنفعش .
أنا مقصدش أوجع دماغكوا قصدي بطنكوا ، بس فوقوا وخليكوا مدردحين ، وخسوا شوية ، قصدي تشيلوا الجلخ إللي علي المخيخ أصل شكلنا بقي بايخ ، ده مش مدعاه إن إسرائيل بلد عظيم وناس محترمة ، لا يا سيدي ويا ستي ، هما أولاد خنازير متزعلوش ، بس الموضوع مش كدة الموضوع إن ندور علي الخلل وأسبابة ونحصن نفسنا منه ، أصل مع الوقت هنلاقي نفسنا برة الزمن ، بس مش برة ألة الزمن وشغل الأفلام ده ، لا مش هنبقي في الزمن أساسا ، وأقصد بكدة لا هيبقي في ماضي ولا حاضر ولا مستقبل ، أه والله مهو لما نلاقي كل حاجة بتتسلت مننا كل شوية ، ويحلوا محلنا في حاجات أساسية وغير أساسية ، وكل شوية يضيقوا علينا من فوق ومن تحت ومن جوة ، هنلاقي نفسنا مرة واحدة البساط أتسحب من تحت رجلينا وهبا نلاقي نفسنا زي مقولت ليكوا خارج إطار الزمن ، سحبنا بقي علي كوكو تاني ويمكن ميطلعش فيه رز ، عشان كدة يا شطار منستغلش بعض أه الرز أبو ٨ جنيه ولا اللحمة ولا الكهربا قال وأيه بتقطع كمان طيب ينفع كدة .
عموما شكلنا ريحين للكوكو التاني بس هتلاقوه ضلمه وحر ومش هتلاقوا فيه لا رز ولا لحمة عشان متعرفوش تعملوا كفتة ، طول ما نتنياهو ورفاقه بيفكروا صح ، وإحنا بنفكر غلط ، أو بلغة الشكروت بنفكر شمال .
