مين اللي قال؟!!
الموت فراق أو عذاب
أوليل ضباب بيودع حياه
مين اللي قال؟!!
إن الدموع تفضل دموع
والفرح ملوش بيبان
مين اللي قال؟!!
الضلام من غير أمل
يصبح ملاذ المكفوفين
ولا العجايز من غير سند
تحبي زي العيال الصغيرين
إحنا مين !!
لو بإيدي خد اللي باقي من عمري..
كمل حياتك واعشق فرحتك
ناوي الرحيل؟!!
خدني معاك وَنَس في رحلتك
تمسح دموعي وأَبقى فرشتك
واحشني صوتك،
صرختك،
ضحكتك،
غنوة حياتي ودنيتي
فتح عيونك
لو ف الخيال اوهمني
إن بُعدك محال
وأنا أصدقك
ما أنا شاعر والخيال دنيتي
وافتكر كل يوم صباح
ألبس هدومي ألقاك جايبلي فرحتي
تمسك إيدي والضحكة سابقه خطوتك
لسه فيه أمل..
لسه فيه حياه
لسه الطريق موصلش بينا لمنتهاه
وأنا برضه م الآخر بشر
والفراق كان قدر
وأنت الملاك اللي لسه ما اتفطم
قول لربك وربي
يخليك ونس في دنيتي
وإن كان قدري الرحيل…
تبقى الونس في رحلتي
