كتب : إسلام النجار
هو فيه حاجه اسمها مصري بشرطه ؟ يعني مصري مميز او من الصفوه ؟
للاسف الحقيقة ان الاجابه اه فيه مصري بشرطه …….
كلنا كمصريين ماعدا المميزون دول ليس لنا اي حقوق داخل دولتنا المحترمه ولكن علينا واجبات تعظيم وتفخيم لهذا المصري المميز مش مهم بقي مهنتك ايه او دورك ايه في البلد سواء كنت لسه بتتعلم او شغال دكتور او مهندس او محامي او عامل او حتي سائق او اي مهنه محترمه بتساعد كتير من المصريين كل ده بيتمحي لما بيذكر المواطن المميز ده في اي جمله مفيدة , طبعا كتير مستنين يعرفوا مين هو المواطن المميز انتوا اكيد عارفينه مش محتاج وصف , هو كل مواطن الدولة واعلامها بيدولوا الحق انه يسحل ويهين كرامة اي مصري وكمان يحبسه ويتحكم عليه ويطلع الاعلامي من دول يعنف في المواطن ده وانه اخد جزاءه , اما بالنسبة للمواطن المميز فهو خارج مستوي الشبهات مينفعش اصلا نجيب سيرته ولما يغلط يطلع تبرير سخيف ( ده هو اللي حاميك ) في انهي قانون وانهي شرع مذكور الكلام ده !!! هل مبرر ان دكتور عملك عملية ناجحه او محامي جابلك حقك او فني عملك صيانه للبيت وانقذه من الغرق ان اي واحد منهم ابررله انه يضربني ويسحلني ويهين كرامتي سواء هو او اي واحد تاني بينتمي لنفس المهنه !!! والمتاجرة بقي بدم المواطن المميز ده مقلوكش اكنه من جنس تاني وبعدين يرجعوا يلوموا الشباب انت مبيحركمش الدم ومش هامك , ودي بتبقي محاولة استفزاز ليس الا اكيد من غير كلام كتير دم اي مصري مهم وبيأثر فينا لكن ده مش مبرر لبقيت المواطنين المميزين اللي تابع ليهم هذا الشهيد انهم يتهكموا علي كرامتي وانسانيتي , عارفين امتي هتكسبوا الشباب ؟ لما يحس انه بيتعامل زيه زي اي مواطن تاني من غير تمييز لما بجد يشوف العدل .
