بقي يصح كدة رقم ” ٥ ” عمال مصر إنتوا هتستهبلوا !!!

بقلم / خالد الترامسي

هما العمال بيتذمروا من إيه ، بقي يصح كدة يا جماعة ، كل شوية نتنطط ، وإعتصامات ، وشقلبظات ، البلد مش ناقصة إحنا لسة في مرحلة بناء ، متشدوا الحزام شوية ، ولا هاتوا صخر وحطوه علي بطونكم ، عادي يعني دا دي مصر أم الدنيا ، بقي تستخسروا فيها أنكوا تصبروا شوية وتشدوا الحزام شوية .

طيب نعمل لكوا إيه نستبدلكوا بشوية هنود ولا فلبيين ، الناس دي زي الفل يدوبك إديهم عيش حاف وشوية ميه ” مياه” هيهيصوا ويبقوا مظقططين ، فرفشوا بقي بدل متلاقوا نفسكوا كلابوش ، ومش هنغلب فيكوا .

طيب هقولكوا علي فكرة إنتوا بتشتغلوا في اليوم شغلنتين ، ولا بطبقوا ورديتين، فيها إيه لما تدوروا علي عمل تالت ، مفيهاش مشكلة ، مش ضروري تناموا ، دا حتي النوم وخم وبيعمل مشاكل كتيرة ، هو صحيح قلة النوم ، أو إنعدامه بالنسبة لكم هيضيع العمر الإفتراضي بتاعكوا بس عادي ، هو إنتوا هتيجوا أغلي من ١٢٠ ألف إللي ماتوا في حفر قناة السويس ، يلي يا جماعة إثبتوا إنكوا وطنيين وبتحبوا وتعشقوا تراب هذه الأرض المباركة ، وسيبوكوا بقي من شغل الخزعبلات ده ، وهري القلب إللي ممنوش فايده.

والله يا حبيبي قلتلهم علي فكرة نوفر تمن الكام قنبلة غاز إللي بتترمي عليكوا كل مرة لما تروحوا تعملوا لهم صداع ، ونوزع عليكوا الثمن بالعدل ، بس إنتوا طماعين ، عاوزين أكتر بس دي والله كانت بداية ، يعني كنت ممكن أدخلهم بفكرة تانية وتالتة ونعدي رابعة لخامسة علي طول أصل رابعة دي بقت كخة دلوقتي ، أوعوا تجيبوا سيرتها ، والله جُعبتي مليانة أفكار ، بس ثقوا في وهتبقي زي الفل والورد والكراوية والمستكة والحلبسة ، بس زي مقلت الثقة .

وبعدين يا جماعة إتقنوا عملكوا ومتناموش كتير وقت العمل ، دا حتي مشهور انكوا بتصدروا أصوات موسيقية غاية في الجمال ، ولا التزويغ والكت ، إرضوا بقي باللي قسمهولكوا ربنا انتوا هتفتروا ، مينفعش كدة فعشان خاطري كلوا عيش ، ولا كلوا بامية ، هي بكام دلوقتي إحنا عاوزينها الكيلو بربع جنية عشان تعرفوا تشتروها.