⬅️الطقطقة عمرها ما كانت ولا هتكون نقص كالسيوم وعادى جدا ومعظمنا بنطقطق وانا اولهم وبطقطق
⬅️اللبن بعده موز عمره ما يموت.
⬅️السمك و اللبن مع بعض عمرهم ما هيجيبوا نقرص و غيره
⬅️اللبن البقري او الجاموسي ممنوعين قبل سنة
في دراسة جديدة قالت ان الزبادي مسموح بيه و ان بروتينات اللبن المسببة للحساسية بتتكسر فيها علشان كدا اديها من 8 شهور
⬅️ اى اكل فيه كالسيوم ممكن ناكله مع اى اكل فيه حديد عادى جدا، والجسم هيمتص الاتنين و هيستفاد ان شاء الله ،بس طبعا في الادوية يستحسن نفصلهم عن بعض
⬅️ اقسم بالله فيه امهات بتدى السفن اب من شهرين طبعا غلط جدا
⬅️والله العظيم لو قعدنا نلحس للطفل قهوة عمره ما هيبقي اذكي و لا هيتكلم اسرع بالعكس هيسهرك و انتي اللي هتقعدى تكلمي نفسك طول الليل
⬅️الكوسة لو اكلتيها ببزرها عمر ما ابنك هيجيله ديدان
⬅️الطفل لو اكل بقوليات قبل سنة عمر ما يجيله انيميا الفول الا لو عنده استعداد وراثى اصلا
⬅️اللي يقولك ان الطفل اللي عنده اربعين يوم لو مأكلتيهوش هيطلع بيكره الاكل بالشبشب على دماغه انا زهقت اصلا .
⬅️تقبل الطفل للاكل طبيعة و استعداد ليس الا والأطفال مش زى بعض
⬅️الزيت زى زيت الزيتون مش ممنوع لحد سنة ممكن بس اضافته تكون علي البارد مش تسخنيه و تحمري فيه
⬅️ تيجى تقوليلي يا دكتوره لو ضربت لبن في بيض و حليته بالعسل كده مناعته هتبقي زي الفل ده انا هضربك بكل حاجة تيجى في ايدى غلط جدا
⬅️الطفل لو بؤقه بيوجعه بلاش عشان خاطرى يرضع من معزة
⬅️لبن الرضاعة للرضاعة فقط يعنى بلاش تحطي في عينه ودنه ومناخيره أو تدهني جسمه عشان يقلل الشعر كل ده غلط
⬅️وحياتى عندكم بلاش رضعة بيبي درينك و اعشاب في المستشفي غلط جدا جدا جدا الرضاعة فقط عشان خاطرى
⬅️ متكلمنيش من اول يوم الولادة وتقوليلي مفيش لبن ، وبعدين اسألك طب فيه لبن السرسوب؟
تقوليلي اه على اساس ان لبن السرسوب مش لبن و الله لبن و بيكفي الطفل جدا و بيغني عن اي حاجة
⬅️اللبن الصناعي اوعى تعملي بيه مهلبية و بشاميل و حاجات كدا لأنه
غلط جدا انه يتسخن علي النار بس ممكن اضيفه علي البارد
⬅️ بلاش تنظيم الرضاعة رضعى لما طفلك يحتاجك
تخيلي انك جعانة و بتعيطي و بقولك لسا ساعتين ممكن انا اقولك نظمى الرضاعة لو حسيت ان وزن ابنك بيزيد فوق فوق الطبيعي او في حالات معينة الطبيب اللي بيحددها.
⬅️ بالله عليكم بلاش كلمة لبنى خفيف و مش بيشبع لو وزنه بيزيد كويس خلاص بلاش فتي وبلاش صناعى
⬅️ مفيش حاجة اسمها البنات بيرضعوا اكتر من الولاد فيه طفل بيرضع كتير و طفل قليل بس كدا
⬅️ بلاش الطفل اللي بيرضع صناعي تشربوه مية من اول يوم
لأن انتي اصلا بتعملي الرضعة بمية، فبلاش حجج واهية انه عطشان
⬅️الفطام مش لازم اخر الشهر العربي أو يكون متزامن مع رؤية الهلال
⬅️ الطفل اللي يتفطم و يرضع تاني عمره ما هيكون حقود حضرتك الصفات السلبية ابنك بيكتسبها من اللي حواليه خدي بالك
⬅️الطفل بعد سنة اللبن عمر ما فايدته بتضيع و ربنا قال في عامين
⬅️ الشكوى المتكررة ابني بيعيط و يمص صباعة وحاساه مش بيشبع و صدري مش تقيل باللبن و بعصر بينزل نقط مش بملي ازازة
والنبى بلاش مبررات هنسأل تاني وزنه زاد ؟طب بيعمل بول وبراز كويس
يبقي شكرا متخليش حد بقي يضحك عليكي و ربنا يعينك
⬅️الاسهال اللي زي المية علاجه مش سميكتا و لا هيكون كابكت هناخد محلول جفاف ونكشف لأن ده ميكروب عايزين نطرده، مش هندي ممسكات عشان نوقف الاسهال مرة واحدة بالعكس احنا هنعوض جسم الطفل بالسوائل بس
⬅️الطفل اللي بياخد مضاد حيوي كتير سنانه مش بتتاثر مناعته هى اللي بتتأثر لو بناخده من نفسنا بدون وصف طبيب
⬅️نقط علاج الصفرا و دوا شراب والاقراص اللي بتدوبوها و الحاجات دي هري هري هري الصفرا اما فسيولوجية و هتضيع بالرضاعة او مرضية و عايزة حضانة خدي بالك
⬅️الكالسيوم بنقولها كتير لازم تحاليل و الا بيترسب علي الكلي
⬅️الكحة علاجها كشف بالسماعة ،والتهاب الحفاض يفضل كشف لأنه انواع ،و التهاب الزور اساسي كشف، و النزلات المعوية كشف وش
⬅️البراز الاخضر مش كله برد ممكن ان الطفل مش بياخد اللبن الخلفي و بيكتفي باللبن الامامي بس حله نرضع من كل ناحية مرتين لحد ما نفضيها مش نبدل الطفل بين الثديين بسرعة
⬅️الطفل اول ما يتولد بلاش قرف بالله عليكم انك تدهني جسمه بلبن الام او دم الوطواط عشان يطلع شعر جسمها خفيف
⬅️ طفلك لما يشرق بلاش تنفخي في وشه طبطبي علي ضهره بشويش كفاية
⬅️لو اخد دوا و بعدها رضع او شرب مية الدوا مفعوله مش هيقل خالص
⬅️بلاش هبل انك متقصيش ضوافره بليل علشان الكالسيوم و الشعر متقصيهوش في نص الشهر و الختان لما تشوفي الهلال و افطمي اخر الشهر عادات لا معني لها اساسا
⬅️لو وقفتي الطفل علشان يشد رجله و مشدهاش عادى جدا على حسب عمره ومش معنى كده انه يبقي محتاج كالسيوم
⬅️كرش الطفل مش بسبب شرب المية وسط الاكل الكرش سببه ضعف عضلات البطن للطفل او اكل الاكل اللي سعراته الحرارية عالية ودا طبيعي لحد سن السنتين
⬅️الطفل لو اخد التطعيم و ما سخنش عادى جدا والله ومش بايظ ولا حاجة
⬅️قص الشعر مش بيخليه احلى ولا حاجة ولكن قص الأطراف مطلوب
⬅️التقوس في حديثي الولادة عادى جدا والله
⬅️مفيش حاجة اسمها جرعة ديدان وقائية ولكن ممكن نديها لأفراد العائلة الواحدة عند اثبات اصابة فرد فيهم بتحليل البراز
⬅️مفيش حاجة اسمها ابنى دفيان فيه اختراع اسمه ترمومتر بيقيس الحرارة لو اكتر من37.2يبقي سخن غير كده لأ
⬅️التسنين مش بيسبب برد او كحة او التهاب في العين بالكتير ممكن حرارة بسيطة متعديش 38 او اسهال خفيف و ريالة و زن مستمر
⬅️حكاية دهان الصدر بزيوت او مستكة او نحط ورق جرايد اثناء الكحة بصراحة No comment
