مسرحية

 المرمطون

تأليف / محمد محزم

إهداء

إلى سيدي وأستاذي وأبي الروحي/

     أنور عبد المغيث

دُمْتَ سيدي إنسانًا ومبدعا،،

المنظر الأول

يرفع الستارعن حارة السعادة حيث نرى الورش وقد بدأت فى فتح أبوابها وفى الواجهه ورشة الحاج فرحات لتشكيل المعادن ويظهر برجو وهو يكنس ويرش أمام الورشه وهو يتمايل مع صوت أم كلثوم وهى تغنى ( ياصباح الخير ياللى معانا) الذى ينبعث من راديو  وبعد أن ينتهى من التنظيف نراه يسحب كرسيا وبده كوب شاى وهو يقول

          : يافتاح يا عليم يا رزاق ياكريم  ، يارب تجعله صباح نادى ولا أقولك

            يارب بلاش نادى ربنا يكفينا شره ، يارب تجعله صباح فرح وسرور

           ورزق وستر   

يدخل الحاج فرحات وهو ينادى على برجو

           : عملت شاى لنفسك بس  يا ندل  ، عموما صباح الخير

برجو     : صباح الفل والرضا والسعادة ياحاج ثوانى وأعمل لك الشاى

الحاج    : طيب بسرعه علشان ألحق  مشا ويرى

برجو    : عنيه يا حاج

يجلس الحاج ويبدأ فى التسبيح على مسبحته وأساريره منبسطه و يدخل إلى المسرح نادى وهو  كومندة الصنايعيه فى الورشه وهو قد تجاوز الأربعينات من عمره ويتجه مباشرة إلى الحاج

          :   ياصباح الخيرات يا حاج ، وشك ولا القمر، إنت من بدرى هنا

فرحات   :   صباح الخير يا أسطى نادى إيه الأخبار ناقصكو حاجه محتاجين

              خامات ؟

نادى     :   كله تمام يا حاج محتاجين بس صناعيه زياده علشان نلحق نخلص

              الشغل المطلوب مننا

فرحات  : إيدى على كتفك يا أخويه هاتهم وإتفق معاهم وأنا على أدفع أجرتهم

يدخل برجو وهو يحمل صينية الشاى وحين يرى نادى يتغير وجهه ويقول     

             :  يا حافر الحفره وسع مراقيها لخيك المؤمن يقع فيها

     ينتبه له  نادى ويعرف أن الكلام عليه فيقول له 

             : مالك يا أأأأأأأأأأأأ

أد كأنك شفت عفريت ، فكرك إنى مش هقول  للحاج على   أأ

              عملتك السوده؟

فرحات     : عمل  إيه بس ؟ دا برجو ده غلبان وبعدين يا نادى ده معايه من يوم

               مافتحت الورشه

نادى وقد أحس أنها فرصه كى يدق إسفين بين الحاج و برجو

            :عمله إسود ومنيل على دماغه ، إمبارح مسكته وهو بيبوظ فى البضاعه

برجو      : أبدا ولله ياحاج دى حته فضله كنت عايز أشكلها

نادى       : وهى حتة الفضله دى مش بفلوس، وبعدين أنت مين أمرك تشكلها ،

              هو أنت هتعمل فيها صناعى يا مرمطون

فرحات     : برجو مش مرمطون يا أسطى نادى

نادى       : والله ماحد مبوظه غير طيبتك ياحاج   وبعدين هو مرمطون الورشه

              إزاى يتجرأ ويقف على مكنة التشكيل

برجو وقد بلغ من الغضب مداه

            : عايز أتعلم يا أخى ولا أنا هافضل طول عمرى مرمطون ليك 

             (ويحاولا تقليد  نادى ) أكنس  ياااد برجو  إمسح ياااد يا  برجو  

            روح أعمل لى شاى ياااد يا برجو  روح هات لى فطار ياااد يا برجو

          ، ناقص عليك تقول لى تعال أمسح لنا السلم فى البيت ياااد يادجوإعمل عجين                  الفلاحه يا برجو        

نادى    : يا ابنى إفهم انت هتعيش مرمطون الورشه وتموت مرمطون الورشه              

           اللى أتعلم الصنعه إتعلمهامن زمان ( وينظر إلى برجو بسخريه ) ويقول

          : قال على رأى المثل بعد ما شاب ودوه الكتاب

  نادى     : وناقص كمان تقولى  هتفتح ورشه

برجو وقد كسا وجهه الذل

          : مافيش حاجه بعيده على ربنا

نادى       :  وحياة  أبوك ماتنساش تسميها ورشة المرمطون

برجو       : أوعدك يا أسطى  لوربنا فتحها عليه  

نادى     :  بس  خلى بالك أنا إمبارح خصمت لك يوم… بس بعد كده لو أتكررت 

          هتشوف أيام سوده معايه

فرحات   :  جرى إيه يا أسطى جرى إيه يا برجو  واقفين تردحوا لبعض زى

            النسوان ولاعاملين أى  إعتبار لوجودى

نادى    : يعنى مش شايف قلة أدبه ياحاج بابقاش إلا المرمطون ده وعايز

            يعمل فيها شيخ الصنايعيه  

برجو    : اللهم طولك ياروح

نادى    :  وإن قصرت يبقا أحسن

فرحات  : خلاص روح شوف شغلك يا برجو ولما أرجع نبقا نكمل حديث المدينه

            وبعدين  ياااااااااااد ده الأسطى نادى  واخد بالك  ليه يا برجو ده الأسطى نادى

برجو   : وأنا عملت له إيه بس  ياحاج ؟ هو اللى شايلنى على   دماغه  وزاعق 

نادى   : هاشيلك على دماغى وأزعق ليه ياسيد أبوك ؟

           تكونش ياااد فاكر إنى شايفك من أصله ؟

برجو   :   تقول إيه بقا العين مابتكرهش غير اللى أعلا منها

نادى   :   شايف قلة أدبه وسفالته ياحاج ؟ وبعدين  أنت أعلا منى فى إيه

            ياواطى  يالمامه ياعرة  المرمطونات ؟

برجو   : علشان أنا متعلم  وأنت جاهل أنا معايه ثانويه عامه وأنت مابتعرفش

           تكتب إسمك

نادى   : مشيه  ياحاج  ومن بكره  الصبح أجيب لك خمسة أصانصات يشتغلو

           هوحد لاقى شغل ؟

برجو  ساخرا

        : وياترى  هتجيبهم باللافندر ولا سيجار ؟

نادى    : لأهاجبيبهم باللطافه والظرافه ودمك الى يلطش

برجو   : معلش علشان الورد يتسقى العليق

نادى   :  بإذن الله هأعلقك من رجليك على باب الورشه غور إعمل لى كوباية زفت

برجو  :  مافيش زفت علشان مفيش سكر

نادى  : إزاى يعنى ما أنت لسه طافح شاى شاى  وكبايتك لسه فى إيدك

برجو :  هما كانوا معلقتين سكر عملت واحده للحاج وواحده ليه

نادى  : طيب أتصرف  يابنى أدم وهات سكر ؟

برجو مقلدا منير

        : ونادى عايز سكر ومنين أجيب له سكر يارب يحبسوه

نادى  : إتصرف يابجم واعملى شاى

برجو  : أتصرف لك منين أنا ؟ لو عندكو سكر فى البيت روح هات لنا  كيلو

نادى   : أجيب كيلو علشان تطفحه انته  ماهو أنت قاعد طول النهار و الليل

         لا شغله ولا مشغله يدوبك بتشرب شاى وقهوه

نادى  :  يعنى عندكو سكر ومخبيه أنت  مع الاخوان ياعم الحاج؟

فرحات ضاحكا

       : أهوه لبسك تهمه  ومش أى تهمه قلت  لك ما لكش دعوه بيه

         ، عموما نهاركو أبيض أقوم أشوف مصالحى  

ينصرف فرحات ويبقى نادى و برجو

نادى   : يااااد لم نفسك وكل عيش أنا صعبان عليه إنى أقطع عيشك  من   الورشه

برجو   : يا أسطى يعنى أعملك إيه ؟ ليه مش عايزنى أتعلم الصنعه

نادى    : ماهو حتى لو بقيت صاحب مصنع  مش ورشه هتفضل فى نظرى برجو

        المرمطون ، فريح دماغك

        قال على رأى المثل ( ياأبا إمتى  تشرفنى قال لما يموت اللى يعرفنى)

برجو  : قادر على كل شئ

نادى   : إنت بتدعى عليه روح إغسيل وشك الأول ( متجها إلى الجمهور )

           مشوها وشك والنعمه ماتفرق كتير

برجو : إتريق براحتك ياأسطى مسيره الزهر يلعب معايه

نادى  : يا إبنى حتى لو الزهر لعب معاك هتلاقيه ممسوح خدها حكمه  هتعيش

          مرمطون وتموت مرمطون

يدخل  الصنايعيه  ويلقون التحيه على نادى الذى يبادرهم  قائلا

      : نموسيتكو كحلى يارجاله  ولا الشمس ماعدتش على بيوتكم يلاكل واحد

        يشوف شغله

برجو : وأعملوا حسابكم  مافيش شاى ولا قهوه علشان مافيش سكر واللى

         مش عاجبه يبقا تبع الأخوان

أحد الصنايعيه 

       : والله طول ما أنت فيها  يامرمطون الغبره ماهيبقا فيها  حتى بق ميه نشربه         

برجو : ماتقلقوش أثيوبيا قامت بالواجب

نادى وقد بدأ الصداع يفتك برأسه يتجه ناحية برجو

     : أمرى لله أنت ياااد ياللى أسمك برجو

برجو  : نعمين

نادى : ماتبطل ياااد سهوكه ولا أنت فاكرنى الحاج هتاكل دماغه بسهوكه

         النسوان دى

برجو : يارب صبرنى على مابليتنى عايز إيه ياأسطى؟

نادى : روح البيت عندى ومن وأنت على الباب تقول لهم يجيبو شوية سكر

برجو : عنيه

نادى : وياريت بلاش لكاعه ولت وعجن طول ماأنت ماشى

إظلام