من تأليف محمد محزم

إهداء إلى سعد حلاوه  وإلى كل المؤمنين بقدسية هذا الوطن إنساناً وأرضاً

المنظر الأول

يرفع الستار عن مرجيحة و هلهوله وهو فى بداية الثلاثينات من عمره واقف بجانبها يغني و في الخلفية بيت قديم من دور واحد مقسم الي حجراتوفي يمين المسرح واجهة مسجد الرفاعي و علي يسار المسرح تظهر القلعه تطل علي المشهد

هلهوله : آه يا دنيا غداره وقلابه

            شبه المرجيحه وآهين يا آبه

           تمشي عدل يبصوا لك بغرابه

          ويوصفوك بالعبط لو عاملتهم بطيابه

           بعد ما كنا ملوك الكار صبحنا غلابه

            واتحكم الندل وبقينا في غابه

            واللي يغفل تقرقشه الديابه

            امانه يا نسيم الصبح

             صبح علي الغاليين

            انا في جاه المصطفي

           والسيده وابو العلمين

           وستى نفيسه المغيثه

            وسيدى نور الدين

يخرج جاسر دعبس من غرفته ويتجه الي هلهوله موبخاً

            : اصتبحنا واصتبح الملك لله ،اطربني واشجيني يا كروان المراجيح يا ابني قلنا لك بطلنا روح شوف لك                  شغلانة في حته تانيه

هلهوله : حد يسيب كاره يا معلم الله يرحمك يا معلم منصور من يوم ما مت واحنا شفنا الذل

جاسر : تربة منصور مش بعيده روح اقعد جنبها وقول مواويلك يمكن يرق قلبه ليك ويطلع لك من التربه،يا ابني فوق             ماعادش حد بيركب مراجيح،كله بقي بالكهربا  والكمبوتر

هلهوله : الله يجازي اللي كان السبب كانوا خمس مراجيح صفصفواعلي واحدة وخربانه.

جاسر : ايوه اتلامض علشان يبقي يومك زحل

هلهولة : يا معلم علشان خاطر عضم التربة هات الاسطي عزيز يصلحها

جاسر : عزيز في عينك انا فاضي علشان اصلحها وادفع الشئ الفلاني

هلهولة : الموالد جايه يا معلم واللي حتدفعه هيجي لك قده عشر مرات

جاسر : ياعم هو حد قالك اني صايع علشان الف وراها في الموالد

هلهولة : ايوه مش فاضي تلف وراها بس فاضي تهلس

جاسر : اخص الله ينعلك انا بتاع هلس برضوا انت عايزتجيب لي نصيبة علي الصبح ربنا يستر والبعيدة

            ماتكونش سمعتك

هلهوله: اصلب طولك يا معلم ما انت عارف ان أم المحروص  ودنها تقيلة

تخرج عزه بنت منصور دعبس من غرفتها وتتجه بوجهها ناحية مسجد الرفاعي وتقول

         : صباح الخير يا رفاعي يا نسل البني العدنان

              يا مداوي سم الافاعي يا حنين علي الغلبان

وتتجه ناحية جاسر وهلهوله وتقول

         :صباح الخير يا عمي يا اللي المفروض تشيل همي

جاسر بعصبيه : صباح الخير يا عزه لولا لماضة لسانك كنت قلتلك يا وزه

عزه   : لا وزه ولا بطه اديني حقي وحق اخويا شبعنا من الاونطه

جاسر غاضبا :حق ايه يا نور العين ولا تكونيش فاكره ابوكي سابلك الملايين

عزه : ساب لي خمس مراجيح يعيشوني مستوره بعتهم واحده ورا التانيه يا اللي ذمتك أوسع من القلعه

جاسر : حتي المرجيحه الباقيه جمعت لها زبون خلينا نخلص من دي شركه وكل واحد يروح لحاله

هلهوله : اللي حيقرب منها حأروح فيه اللومان

جاسر : تكونش اخونا التالت يا عره يا صدمان

هلهوله : صحيح مش اخوكم بس دي اخر حاجة من ريحة معلمي منصور ده من حبه فيها سماها نور العيون والله              الكلمة ما تهون

جاسر : لا يا حبيبي هانت يللا اسرح بعيد

عزه : مسيره فارس يرجع  ياخد حقنا منك وترجع ايام الهنا

جاسر : يرجع فين يا شاطره؟ بعد ما راح اروبا؟ حتي لو رجع فاكراه حيربط حياته بالمراجيح؟

عزه : فارس متربي ومتعلم من خير المراجيح ’ده ابن منصور’ برضوايا ابو عقل خفيف

في هذه اللحظة يدخل ’حلاوة المجنون’ وهو من مجاذيب الرفاعي قائلاً

              :لا عمر خضره الشيطان غواها

                ولا دعبس اكل السحت

          طالع شيطان لمين يا خاربها؟

        الناس تبني وتعلي وانت غاوي فحت

ثم يمضي دون ان يكلم احداً من الواقفين فتنده عليه عزة

              :حلاوه حلاوه يا مجنون

   حلاوه    : عايزه ايه يا سنيوره يا جميله ومقهوره

عزة ضاحكة : فطرت يا حلاوه؟

حلاوه    : فضل ونعمة فطرت في رحاب مولانا الحسين ودعيت لك تكوني مستوره ومنصوره علي الخاينين

جاسر ساخراً من حلاوه وعزه وهلهوله

          :وادي الحبل بقي متلت الصدمان والمجنون والمطيوره ياريتني معايا كامرا كنت خدت لكم صوره.

حلاوه ناظراً ناحية المسجد

          : يا اخي ربنا يهديك يا إما علي قد نيتك يديك جاسر : بتدعي عليا يا مجنون تكونش فاكر نفسك ولي                     بصحيح؟

حلاوه  : يا اخي كفايه ايامه يا واكل حق اليتامه

جاسر  : اخرس لأضربك كف يرجعك عاقل

حلاوة : انا اعقل من امثالك يا حرامي يا غافل

تتدخل عزة لتفض الاشتباك بين جاسر وحلاوه

        :جري ايه يا عمي ولا هو اللي علي راسه بطحة بيحسس عليها؟

جاسر : بطحة ايه اللي علي راس عمك يا متربيه؟ وايه لزمةكلمة عمي من اصله؟

هلهوله : صلي علي النبي يا عزه ربنا ينتقم من الظالم

حلاوه : والضلالي وابن الحرام

جاسر : صدق اللي قال إتلم تنتون علي تنتن والاتنين انتن وانتن يللا بقي كل واحد يشوف مصلحته بعيد عننا

عزه : لما يبقوا يدخلوا عندك الاوضه تقول لهم كدههما واقفين معايا علي مرجيحة ابويا جاسر : بجحي كويس ان ما حرقت قلبك علي المرجيحه ما ابقاش جاسر

تخرج ام المحروس زوجة جاسر من غرفتها وهي تربط الطرحه علي رأسها وتبحث بعينها علي جاسر

             :فينك يا سبعي سايبني نايمة وروحت فين؟

جاسر     : حأروح فين بس علي الصبح طلعت اولع سيجاره علشان الدخان ما يتعبش صدرك

ام المحروس : طول عمرك خايف عليا وعلي صحتي يا اخويا،وياتري كام سيجاره عدوا قدامك وانت واقف؟

جاسر      : يا وليه اعقلي وبلاش تهم باطله علي الصبح

حلاوة ساخراً من جاسر

             :شوف السبع حامي عرينه ولا يخاف في يوم من حريمه

جاسر وقد بلغ به الغيظ مداه

              : يللا يا ستي ادخلي فرجتي علينا لمامة السكك

 ام المحروس : قدامي يا سبعي يا اللي عمرك ما زاغت عينك كده ولا كده

حلاوه      : ذنب ناس تخلصه ناس وربك عليه الخلاص

هلهوله     : معلم جاسر يا معلم جاسر

جاسر   : عايز ايه يا بوز الاخص؟ هلهوله : اقصر الشر وادخل لحسن ام المحروس لابسة كعب عالي وماحدش                   فاضي يوديك المستشفي

يدخل جاسر وام المحروس وهو يشوح بيديه ويبقي حلاوة وهلهولة وعزة

حلاوه    : اسيبكوا انا بقي واروح اصبح علي ستي نفيسه كريمة الدارين المغيثه

عزه     : ما تقعد تفطر معانا وتشربلك كوباية شاي

حلاوه : لا يا اختي ما بحبش ابقي عزول وبعدين انا نفسي اشرب شربات

’وينصرف ضاحكاً’.

هلهوله : يسمع منك ربنا يا حلاوة

عزه    : انت ايه ما صدقت؟

هلهوله : هو اللي نعيده نزيده يا بنت معلمي

عزه      : عمري ما حأفرح غير لما يرجع فارس ويصلح المرجيحه وياخد حقه وحقي من جاسر

هلهوله : يا بنت الناس نتجوز وانا ساعتها حيبقالي صفه اقف قدامه بيها

عزه     : لو حأفضل طول عمري من غير جواز حأستني فارس يبقي وكيلي ويحط ايده في ايد عريسي

هلهوله : يارب رجعه بالسلامة علشان انا خلاص تعبت

عزه    : تعبت من ايه يا اخويا؟

هلهوله : تعبت من البعد عنك يا زوزة

عزه     : فين البعد ده يا راجل؟ مانا واقفه قدامك أهه

هلهوله : هو البعد والقرب في نظرك انك تكوني واقفه معايا؟

عزه    : حأدخل اعمل الشاي علي بال ما تجيب لنا فول وطعمية

هلهوله : واهو يبقي عيش وملح برضو

عزه     : امال اللي فات ده كله كان ايه كان حلم ولا تهيوءات؟

هلهوله : لو قضيت الف عمر معاك حيفضل حلم جميل وأدعي ربنا ميصحنيش منه ابداً

عزه        : لا والنبي يا اخويا اصحا هات لنا فول وطعميه بس تكون سخنه

هلهولة : شوف اقولها ايه تقولي ايه؟

                                     ’إظلام’

إلى اللقاء فى المنظر الثانى

محمد محزم