كلمات / ريم صلاح
من دايون ما اعرفش ليه؟
ما اعرفش ليه …
وقت الكتابه بالمحك
بتبُص لي
وتمد ايد وتشدّني
تتمشّى بيّا ع الورق
فوق الكلام
جنب النقط
بين السطور
صورتك بتبقى تمللي نور
متشعبطه ف حبر القلم
وملخبطه كل الحروف
ماليه النقط ع السطر خوف
ليكون مكانها بين عينيك
تظهر على صورة دموع
أمسح واعيد
وافضل أعيد
الحبر يخلص م القلم
أملاه بسرعه من الوريد
واكتب كلام
يغازلني قلبي من بعيد
واختارمن الشِعر الجديد
أكتب غزل ..
ألمح عيونك طالعه فيه
أكتب غرام
ألاقيك قوام ماسك إيديه
أكتب وجع ..
يطلع أنا
ويفوت عبير شجر اللمون
حاضن ف عطر السوسنه
أرجع بعقلي كام سنه
أيام ما كان جيش البّكا
دايما بيهزم ضحكتي
أيام ما كان شلال دموع
بيغطّي وش مخدتي
والليل بيحضن سكّتي
وانت اللي جيتلي بالنهار
وفتحتلي ف حضنك طريق
غيّرت ويّاك المسار
وفرحت بالقلب البرئ
كنت الحبيب
وقت احتياجي للحبيب
كنت الصديق
وقت احتياجي للصديق
وبدأت يومها أبل ريق
على طعم حب مالوش مثيل
حسّيت ساعتها بالحياه
وبدأت اشوف الكون جميل
ما بقاش خلاص يصاحبني ليل
ونسيت معاني الإنكسار
كان قلبك الطيّب عمار
من يومها عايشه معاه وبيه
لو دق دقّه ف الغرام
قلبي يرد قوام عليه
من يومها دوقت الشِعر فيه
وبدأت أكتب ف الغزل
لكن تمللي ع الورق
صورتك تكون فوق السطور
ما اعرفش ليه !
