كتبت : ملك احمد
لقب ” عانِس ” مثير للإشمئزاز والقرف من المجتمع الشرقي وأفكاره العقيمه ~
أول ما عُمر البنت يبقى بين 30 : 35 سنه تبدأ الألقاب تحاصرها من كل الجهات، ده غير التساؤلات عن ” ليه متجوزتش لحد دلوقتي ؟ ” .. ” دي عنست ” .. ” القطر فاتها خلاص ” وكأن ده كله بإيديها هي مش قدر ومكتوبلها ..
ده غير كل طنط حِشريّه تبدأ تجيبلها عرسان أد أبوها ولو رفضت يقولوا ” ماتتبطريش ع النعمة هو انتي لاقيه ” .. ” ضل راجل ولا ضل حيطة ” !
وتبدأ نفسية البنت تتأثر باللي حواليها وتفضل تفكر وتسأل نفسها مليون سؤال وتحس إن العيب فيها هي، واشمعنا كل صاحباتها اتجوزوا وخلفوا وهي لأ ؟، أكيد فيه حاجة غلط، مع إن العيب الأساسي في عقلية اللي حواليها وطريقة تفكيرهم اللي وصلوها لمرحلة إنها تفقد الثقة في نفسها، وزرعوا في دماغها إنها مش هتقدر تعيش لوحدها، والحياة من غير جواز مش هتمشي، بدل ما يقولولها ” حكمة ربنا واللهم لا إعتراض ” ..
بصوا بنظره أوسع للمجتمع وشوفوا كام بنت اتجوزت ومش مبسوطة، كام بنت اتجوزت وجوزها بيهينها وبيضربها ومخلي عيشتها طين، كام بنت اتجوزت وهي مش أد المسئولية وصحتها اتدهورت، كام بنت اتجوزت ومابتخلفش وجوزها اتجوز عليها، كام بنت اتجوزت واتطلقت ! ..
الجواز ليه سلبيات كتير زي إيجابياته ..
الجواز مش حياة ومن غيره الناس هتموت ..
مفيش حاجة اسمها هي اللي رفضت كتير واتبطرت على الناس ..
الحكاية كلها تتلخص في ( النصيب ) اللي محدش ليه دخل فيه غير ربنا سبحانه وتعالى ..
