كتب عصام الخطيب
فى تصريح للدكتور خالد رفعت مدير مركز طيبة للأبحاث والدراسات السياسية
الاسطوانة الجديدة اللى شغالة للمبراراتية والمطبلين هى “الشعب كسلان عاوز ومش بيشتغل !” … مع انه نفس الشعب اللى بيشتغل بره مصر ليل ونهار وبيبدع … مع انه نفس الشعب اللى بيشتغل فى القطاع الخاص ليل ونهار … مع انه نفس الشعب اللى بيشتغل موت فى شركات البترول والغاز والاتصالات .. مع انه نفس الشعب اللى بيعمل المعجزات فى كل المشاريع اللى بيديرها الجيش فى وقت قياسي. …. واللى بيعمله السوريين انهم بيقبلوا باى شغل باى سعر لمجرد سد الرمق مش بطولة ولم يفعلوه ابدا في بلادهم .. وليس مطلوب من الشباب المتعلم المؤهل ان يعمل شاورمة او يسوق تكاتك بسبب فشل الحكومة فى خلق وظائف. …
وبعدين يخش المبرراتى على اسطوانة “الشعب مهمل وبيرمى الزبالة فى الشارع” …. مع انه نفس الشعب المنظم جدا فى مترو الانفاق … مع انه نفس الشعب اللى بيحافظ على محطتى قطار رمسيس وسيدى جابر بعد التطوير … كفانا جلد للذات لتبرير فشل الادارة … المصريين من انشط واحسن الشعوب لما تعطيهم نظام ادارة ناجح وعائد عن عملهم سيفعلون المستحيل … كلمة السر الادارة … هاتوا حكومة ذات رؤية وستندهشون مما سيفعله الشعب.
