كبسولة مركزة للناس المهيسة رقم “٩” وزير الكهرباء قارئي العدادات بيقرأوا العدادات وهما قاعدين علي القهوة !!!

بقلم / خالد الترامسي

تخيلوا السيد الموبجل المحترم أبن المحترمين وزير الكهربا بيقول الكلام دة ، السادة البهوات ، بهوات إيه قول السادة البشوات إللي بيقرأوا العدادات لينا بدل ما يتعبوا نفسهم ويروحوا ياخدوا قرأة العدادات ، يبقي قاعد علي القهوة ويقعد يبلي الناس الغلابة ببلاوي الست أمه ، أتاري يا معالي الباشا بدفع كل شهر بال ٣٠٠ جنية وال٤٠٠جنية بعد ما كنت بدفع تلاتة جنيه وربع ، طيب ينفع كدة يا معالي الوزير ، طيب أنت كدة عرفتني سبب زيادة الفاتورة ، وأنا معتقد إن الكهربا غليت وبقي الكيلو ب ٨ جنية زي كيلو الأرز ، أتاري البشوات قاعدين علي القهوة ، وطبعا تلاقيهم بيقعدوا علي كافيهات محترمة ولا كافيهات إيه قول بيروحوا يكتبوا القرأة في الماريوت ولا شبرد ولا الهيلتون ، مهو ما شاء الله بيعدوا لرجونات أد كدة .

طيب الواحد يعمل أيه يروح يجبهم من قفاهم ، ولا نلعب معاهم صلح وبدل منضربهم علي أيديهم نضربهم علي حاجة تانية ، طيب متشد عليهم يا معالي الوزير ، ولا إنت ناوي تقلب مصر إلي عدادات إليكترونية السعر المدفوع مسبقا نظام الكارت ، فقلت أسيب العيال إللي تبعك يقرفوا أمنا عشان يكرهونا في أم العدادات القديمة ، طيب متجيبها من قصيرها وتقول كدة والله مش هنزعل ، وبعدين هو في حد مكنش بيدفع فواتير الكهربا دا إحنا بندفع وإحنا إللي علي رقبتنا ، ومفيش حد تذمر ولا زمرلك بنبرة صوتية إنت عارفها ، ولا إنت فوفه قاعد في الزمالك ولا مصر الجديدة ومتعرفش في علم “الصوتيات البيئة ” .

طيب الناس إللي بتقرأ العدادات إتقوا الله في عملكوا عشان ربنا يحافظ عليكوا من التسريح ، مهو لما يتركب في مصر كلها العدادات الإلكترونية مش هيبقي ليكوا لازمة ، وبالتالي هيسرحوكوا ، وكدة كدة هتقعدوا علي القهوة ، وتبقي الشطارة والفهلوة والمليطة بتاعتكوا تنفعكوا ، وساعتها إنسوا شبرد والماريوت دا إنتوا مش هتلاقوا حتي غرزة معفنة تقعدوا عليها .

بس أنا خايف أكون ظلمت الناس دي ويكونوا من أهل الخطوة الناس الحلوة دي إللي عندهم شفافية ، وأتصال وجداني مع ربنا ، وتكون العدادات بتجيلهم لحد القهوة عشان يقرأوها ، أه أصل في ناس كدة عندهم إلهام وسعاد وحنان وسوسن ، كل حاجة بتيجي لهم وهما قاعدين مكانهم من غير ميتعبوا نفسهم .

ويعدين مش يمكن الزيادة في الفواتير دي عشان إحنا ناس مش كويسة ، فربنا بيسلط أبدان علي أبدان ، ما إحنا لو أتصلح حالنا يمكن ربنا يخلي الفاتورة ب ١٧٥ قرش ، شوفتوا الإفترا بتاعكوا وصلنا لأيه ، يعني لما تبقي واقف في المترو وتلاقي واد وبنت بيمارسوا ال love علي طول خلص الموضوع وقلم زرووووو علي قفاهم مش تقعدوا تبصوا لهم وأكنكوا نفسكوا تعملوا إللي بيعملوه ، أه هي الحاجات دي وتوابعها إللي جيبة ليكوا الكافية ، إتلموا شوية هتلاقوا عم الوزير والشلة بتاعتوا بتوع القهوة قاعدين ليكوا زنهار تحت العداد ويمكن يطلعوا ليكوا الفواتير زيرو جنية ، ببلاش يعني .

بس أنا نسيت أسأل معالي الوزير ، هو ليه التصريح بتاعك دة هو إنت قرفان من الناس إللي شغالة معاك ؟ ، أصل المنطق بيقول المفروض تقول العدادين تعبانين من اللف علي البيوت في الشمس والحر والعرق يتصبب منهم ، وبيقبضوا ملالييم ، ويا ولداه مبيعرفوش يشتروا الأرز دلوقتي وبياكلوا اللحمة مرة كل خمسة أشهر ، متكحرتين يعني ، لكن هنقول إية إنت أدري يعني هو أنا إللي قلت إنهم بيقعدوا علي القهوة .

وبعدين يا ريس أنت دخلتنا في مشكلة تانية إن الناس بتوعك بياخدوا مرتبات من غير ما يشتغلوا دا حتي بيتفسحوا كمان وبيكيدونا مش بيروحوا شبرد والماريوت ويمكن بيروحوا كمان شارع الهرم ويشربوا بيريل بدل القهوة ، طيب إنت بتحاسبهم يا معالي الوزير ؟ قولي بس يعني بتخصم من مرتباتهم ومكافئاتهم إللي هي بالألفات ، ولا إكمنهم بيجيبولك فلوس كتيير فإنت مكبر دماغك طيب مش هينفع الكلام دة ، لازم تنفخهم علي الأقل كدة وكدة .