قال وزير التجارة والصناعة طارق قابيل، إن مصر لن تشترى طائرات روسية مدنية إلا بعد عودة نمو التدفق السياحى لمصر ، أيه الكلام الجامد ده ما شاء الله أحنا عندنا وزراء بيفطروا وطنية وبيتسحروا وطنية ، الله عليك يا طارق بيك يا جامد ، والله فكرتني بأيام العظماء ، مينا موحد القطرين ، وعم يوسف وهبي ، فين الروح الحماسية دي من زمان ، بقالي ٧٥ سنة مسمعتش تصريح جامد زي ده وإيه وش مع نظيره الروسي .
طيب يا طارق بيك كنت خف علي الرجل شوية دي روسيا ياااااااااااااااااااا عم الحاج والناس دي ناس ظراف ولطاف ومهلبية في الزبادي ودايما واقفين معانا هو صحيح كله بحسابه ، بس علي الأقل الناس دي أحسن من ناس تانية
وأضاف الوزير، خلال حديثه لوكالة “تاس” الروسية، أن مصر تخطط لشراء الطائرات الروسية، ولكن ليس هناك أى داع لزيادة أسطول الطائرات فى البلاد وعدد السياح قليل، ولكن يمكن النظر فى الأمر عندما يعود التدفق السياحى.
أظن إن سياسة الضغط ولي الذراع دي مش بتاعتنا خالص مش عشان إحنا منقدرش نعمله لا عشان دا عشان حاجات تانية ، من عينة المشرحة مش ناقصة قتله ، وإننا ناس غلابة طحن ، وبعدين يا كبير هو الموضوع بيتقاس كدة دة لو بيتقاس بالوضع ده ، دا إحنا بنا وبينهم حوارات كتير أحسن من موضوع الطيارات والكام سايح المتكحرتين إللي بيجوا من عنظهم ، دا حتي بشوفهم في الغردقة بيركبوا ميكروباص ، ويو ميركبوا تاكسي بيتجمعوا فيه عشان يقسموا الأجرة علي بعض ، فالموضوع إللي بتقايض عليه موضوع فاشل ، لا يا عم الحاج لو عرفت تجيب لنا الطيارات هتهالنا .
تخيل بقي يا طارق بيك الناس دي داخلين معاهم في مفاعلات ، وبنجيب من عندهم قمح وسمك وبطيخ وزلابية وبدنجان وكوسة وقرع ، طيب أنت عندك كوسة ، طيب طيب وصلت كام يا باشا فكها خلي الدنيا تروشن ، ما أنا قلت لك علي إللي فيها العملية مش بالصورة إللي في مخيلتك ، إلعب علي أوربا وأمريكا وخلي الدنيا تشهيص في مصر حسسنا كدة إن في سياح بيجولنا مصر ، مش النسوان ٱللي كاسرين التمانين سنه وجايين وقعين ويمكن يألبونا كمان ، أه ، بتوع الميكروباص .
طيب خلي الناس بتوع السياحة إللي بيبعوا الليلة السياحية ب ١١ دولار للأجانب ” فول بورد ” يعني فطار وغدا وعشا ومشروبات إللي داخل طبعا فيها خمور ، إللي السايح المصري أساسا مبيشربهاش وهجيلك تاني ، يعني بما يعادل ٨٨ جنيه عند الباشا إللي علي أسمك ، و ١١٥ جنيه في السوق السودا وبتحايلوا علي الأجانب ويتذللوا لهم دا غير إن لو حللنا الموضوع بعد العمولات والسمسرة والدعاية تلاقي الليلة ب ٥ دولار بس ، نيجي إحنا بقي المصريين مع موضوع العروض إللي وجعين أم دماغنا بيه وإيه يا كبير الليلة تقف ب ٤٠٠ جنيه أقل حاجة ونيجي نحجز نفاجئ بقي بخوازيق ، حد قالك الكلام ده قبل كدة ، أهو قلت لك أهه أي خدمة ، راقب يا باشا ، مش تقولي طيارة وعربية كارو
