بقلم / خالد الترامسي
بصراحة الجماعة النواب دُولْ شكلهم عاوزين يجيبولنا نقطة وضغط وسكر ، طبعا الفاضي يعمل قاضي ، وممكن يِأَلِفْ ، وياه بقي لما تشطح معاه ، بتبقي فُلَةْ ، طبعاً شطحات إخوانا من النواب تعددت ، بس الشطحة بتاعة اليوم فعلا ممكن تخلي الشباب المتكحرت فيكوستاريكا إللي هما أساسا مش لاقيين شغل أصلا لا في الحكومة ولا القطاع الخاص ، مهي أتقفلت بالضبة والمفتاح في قطاعات كثيرة في البلد ، زي ” السياحة ، والنياحة ، والمعددة ، والندابة ” أه إللي قعدت تندب علي حظها وحظ الواد إللي حليتها وبعد ما ربته وقعدت تجيبلوا في بامبرز وسريلاك وتلبسة وتهندمه وتعالجة عند الدكتور في العيادة مع إن الولد عندة بطاقة ، بطاقة التموين ؟ ، لا لا مش دي ، بطاقة التأمين العلاجية ، وعملتله فيها اللوز طبعا في العيادة ، ودراعه ورجليه لما اتكسروا ، وودتو دروس خصوصية في المدرسة والجامعة عشان الدكتور ميسقطوش ولا لو الواد فالح شويتين ميدهوش ض ج .
المهم مش عاوز أوجع دماغكوا قال إية الست لجنة القوي إللي العاملة حواجبها في المدعوك إللي أسمه إيه ، عاوزة تحط نص في قانون العاملين بتاع كوستاريكا يعمل إية يدي أحقية للمواطنين العرب الحاملين للجنسية إنهم يشتغلوا في الحكومة ، يا خبر ملون ، أمال الريس قاعد يقول إحنا المفروض نقلص عدد الموظفين من ٧ مليون ل واحد مليون بس ، أنتوا عارفين تشغلوا مواطنينكوا الأول لما هتشغلوا مواطنين من دول أخري بقي يصح كدة .
المهم البهوات بيستندوا لأيه أنهم لو شالوا المادة دي ، الموضوع هيعمل مشاكل وهيخلي الدول العربية ممكن تعامل كوستاريكا بالمثل ويمكن تطرد العمال ، قال يعني المادة دي كانت موجودة أصلا في القانون ، يا ابني يا حبيبي أنتا وهو وهي القوانين من يوم الدولة أتولدت لحد دلوقتي لافيها مواد بتقول دول عربية تشتغل عندنا في الحكومة ولا حاجة ، بتفتحوا بقي في الموضوع ليه ، لا بتاع العِقال هيديك نيشان ولا حاجة .
الموضوع ده طبعا يقلقني علي موضوع الجزيرتين ، مهو لما تهيسوا في موضوع تعيين بتوع المعيز ، يبقي حالكوا إيه مع موضوع الجزيرتين ، يعني كنتوا هتملوهم عصير جَزَرْ ، أكيد هتصدقوا لرعاة المعيز عليهم ، يعني أنتوا كنتوا هتدفعوا حاجة من جيب أبوكوا ، عادي ما هي بِجِمْلِةْ ، وأهي سبوبة ، أمال هتحصلوا تمن الدعاية من اين ، دي الدعاية ومش الدعاية وسعاد وتفيدة وبهانة ، حاجات كتير ما شاء الله رزقكوا واسع ، وماشية معاكوا فُلَة ، وكله بحسابه ، وأقله بدل متلاقوا نفسكوا في الشارع ، بالجملة والقطاعي ، فاكرين الواد ……………. والمستشار المحترم………………..، أه هو كدة بالظبط ، ولا يحلو لكوا وسطكوا ونخلص من أرفكوا .
عموما يا حلوين لموا الدور شوية ولازم يبقي ليكوا موقف وطني دي كوستاريكا خلاص قربت تجيب دم من ودانها وهي بتعمل قاقا ، وبعدين الكلام ده ضد سياسات الريس ، ولا انتوا عاوزين تحرجوه ، أنتوا عاوزين تقلبوا عليه ال ٧ مليون موظف ، بقي ينفع الكلام دة ، مش كفايه أنوا مشغلهم والمفروض يكونوا مليون واحد بس ، دة كتر خير الرجل أنه بيصرف لهم مرتبات ، أنتوا عاوزين تجيبوا درفها لا يا جماعة ميصحش كدة .
المهم عاوزين نكون جديين وعلي قدر المسؤولية ومنحملش البلد خوابير إحنا مش قدها ، البلد بتاعتنا دي زي الفل ومش عاوزين ننشر فُولِنا برة ، طيب لما تيجي تعمل مسابقة وعاوز تعين مجموعة من السادة الموظفين في دواوين الوزارات هنعمل أيه ساعتها نرفض نشغلهم هيقاضونا ، وهيكسبوا الدعاوي ويشتغلوا ويعرفوا أسرارنا ، طيب ساعتها هينفع كدة ، طيب لما يجولنا الوزارة لبسين العِقال يبقي الحال إيه أبقي أروح الوزارة أنا راخر بجلبية ، وعادي بقي نبقي نعمل بارتي “party ” ولا النسوان ، والعبايات الخليجي وأية هتبقي ظيطه ، بس والله الناس النواب دول مسخة ، دول شكلهم عاوزين يفرفشونا ، شكلي كدة أقلع لهم ، أقلع لهم ، أقلع لهم ، طيب أقلع لهم أية ، أقلع لهم القبعة هههههههههههههههههه ، عشان الناس دي شكلهم عاوزين يظبطونا ، والله إن كان علي كدة أنا أول واحد مع القرار ده بس أنا مع العباية مش العِقال .
