كبسولة حوار ساخن ساخر ، هو صحيح حوار مش مسموع ، لكن هحسسكوا إني بتكلم معاكوا ودي طبعا هتبقي كبسولات أكتبها باللغة الدارجة ” العامية ” ، إمعاناً في توصيل الفكرة والإلتزام بالقالب الساخر لها ، ده لا يمنع إنكوا تلاقوا بعض الألفاظ أو المصطلحات المجعلصة عادي يعني إبقوا فوتوها ، وهحاول أكون معاكوا بالكبسولات علي الأقل ثلاثة مرات علي الأقل إسبوعياً ، يمكن نقدر نساهم في علاج الناس إللي بقت في الطراوة ، هنسلط الضوء علي أبرز السلبيات إللي طالعة طازة من الفرن بتاع السادة المسؤولين ، واللي هي بالأساس خِلْف خلافة ، لا يتصور عقلاً أو منطقاً أن تستقيم مع الوضع القائم وكلام طبعا بيبقي متناقض ، عموما هتشوفوا .
~وأول كبسولة نبدأ بها ، كلام وزير المالية الغريب الرجل بيقول إيه (لا فرض لضرائب جديدة علي المواطنين وإحالة قانون الضريبة المضافة للبرلمان) حد فيكوا فاهم حاجة ، طيب هو بجلالة قدره فاهم حاجة ، قصدي واخد باله من التناقض ده ، دا إحنا لو هنشقلب الكلام برضوا عمره مهيطلع بالشكل ده ، يا راجل دا الشعب متظبط ومتألوظ وتنفخ بس مش من كتر الفلوس يا باشا ، ضريبة مضافة إيه بَسْ اللي بتتكلم عليها ، في حاجات تانية أمعن وأحسن من ده وتجيب فلوس زي الرز ، نعمل إيه نحول البلد كلها لمناطق حرة إللي يخرج من بيته يدفع جنيه واللي يرجع يدفع ٢ جنيه ، أو نركب عدادات ذكية “intelligent counters “علي أفواه المواطنين ونعمل متوسط ٥ جنيه للساعة وممكن ننوع في التسعيرة ، يعني الكلام في الحب يبقي ب ١٠ جنية ، الكلام في السياسة ب ١٥ ج وأهو تلم فلوس وف نفس الوقت تعالج بعض الأوضاع الإجتماعية ، ولا تيران ومترانش ولا سد نهضة ولا بابا غنوج ، والله يا كبير معاهم فلوس وهيدفعوا.
هو صحيح نص المجتمع بقي شحات ، بس عادي، في ناس كتير معاهم فلوس، دا حتي الشحاتين معاهم فلوس ، يلي بقلب جامد ، هتلم مليارات والله .
~طيب هقولك علي فكرة تانية نفرض ضريبة متدرجة علي مستخدمي النت ” الشبكة الذكية “إللي يستهلك ١ جيجة ناخد منه ٥ جنية واللي يستهلك ٣ جيجة ناخد منه ٣٠ جنية واللي يستهلك ٦ جيجة ناخد منة ١٠٠جنية وأي جيجة أخري نحصل عشرة جنية ، ولا تقولي بقي نطلع قوانين تنظم دخول الإنترنت ولا منتش ، والله العيال الوظاويظ إللي عاملين ليكوا كارلوا في دماغكوا ، هيصوموا عن دخول الأم النت ويمكن يطلقوه بالتلاتة ، أي خدمة يا سيدي هتسد عجز الموازنة أهه ، عجز موازنة إيه قول تسد ديون مصر .
قال الرجل بدل ميلغي بعض الضرايب إللي ملهاش معني وناس تانية بتستغلها وتلم فلوس علي قفا البلد زي ” ضريبة المبيعات ”
أروح أكل يقولي ضريبة مبيعات ، أفسح البنت يقولولي ضريبة مبيعات أدخلها الملاهي يقولولي ضريبة مبيعات ، الواد بتاع الصم والبكم اللي معاه ورق عامل زي ورق اليانصيب وداير يشحت بيه أديله جنيه ، يشاورلي علي إني مخدش بالي إن في ربع جنيه ضريبة مبيعات ، أنا خايف أمشي في الشارع ألاقي الناس ماشية تكلم نفسها في الشارع ، ضريبة مبيعات ضريبة مبيعات ضريبة ،،،،،،،،،،،،،،،،، قال وإيه نزود المبلة طين بضرايب مضافة وضرايب منقوصة .
