قنــــــــــــــــــا الكبرى

كتب دكتور : منصور الانصاري  

” جامعة جنوب الوادي بقنا ” 

كنت مسافر القاهرة مره لابس عمه وفــــــوقها الشال
قمت شاورت لتاكسي وقفلي قال على فين يابن الخال
قلت الشيراتون بس بسرعة عندي هناك موعد في الحـــال
بص بدهشة؟ فلت الشيراتون ايه مش عاجبك فيه اشكال
ولا عشان منا لابس عمه وفوق العمة لاسة وشال ؟
البدلة اهي جوا الشنطة .. وفيه نضاره وفيه جـــــوال
السواق اتبسم لحظة دور وشه تجاهي وقــــال
واضح كدا ان انت صعيدي وصعيدي ومقامك عال
قولي منين ورايح فين ؟ إيه أخبارك ؟ كيف الحـــال؟
انت سيوطي ولا سوهاجي ولا اسولي من الشلال
لنا أسيوطي ولا منياوي دول فوق راسي يا ود الخال
انا من بلد السيد عبــده والقرشــي وعبد المتـــعال

اه يا خال لو زرت بلدنا وشفت القلة وسن الفيل
اصل بلدنا داخله لجوه جنب الحودا بتاعت النيل

اسم بلدنا دعاء ورجاء ومعناها يحفظنا الله
حذر فذر اسمها إيه ولا اقول لك وامري لله

اسم بلدنا قنا المعروفة صعيدية من الساس للراس
اصل الدنيا هي بلدنا وتاريخها محــــفور بالفــــــاس
تلت أثار الدنيا حدانا ويشهد لينا كل النـــــــــاس
الكرنك شاهد على عصره ومعبد لقصر والحراس
القرنة عروسة محناية وعريسها مرفوع الـــــراس
دندره اسنا الكل يقول لك دولا صعايدة اجدع ناس

افهم كدا ان انت صعيدي وصعيدي ابا عن جد
قلت له طبعا وافخر بيها واحمد ربنا كل الحمد
واقدر اقول لك آخر نكته رغم النكته ملهاش عد
كان في خمسة بلدياتنا فكرو يبقو عصابة بجد
قاموا خطفولهم طيارة والطيارة مفهاش حد
قالو طلبنا لو مجناشي كل شويه حنقتلو فرد
هما يا دوب ساعة وربع وكانو الخمسة جوا اللـحد
ضحك الراجل ضحكة طويلة ودموعه سالت ع الخد
قال اه منك اه يا صعايدة تقولو النكته اكنـها جـــــد
لكن عندي سؤال حيرني نفسي الاقي اجابة بجد

ليه بيقولو النكته عليكم وبيعملوا فلم وموال
قلت لاننا صدرنا واسع وبنستحمل تقل جبال
عمر العيبة ما تطلع منا ولا بنحب القيل والقـال
مهما يزيد الحمل علينا عمره ما نخت لينا جمال
لكن ساعة الجد سمحني خف الريشة تقوم له رجال
دمنا حامي زي بلدنا وهي ميزتنا مفيــش فصـــال
عرفت انا مين وجي من منين انا من قنا بلد الرجال
انا من قنا بلد الرجال
انا من قنا بلد الرجال