بقلم / كواعب أحمد البراهمي من ديواني - ضي القمر قلت يمكن يمكن مش جميلة يمكن مش شعري طويل يمكن مش لسه شابة وكلامي في الهوي قليل لكن عايش فيا قلب لسه بيحب ويميل يمكن مش بقدر أغني ولا أقول أحلي كلام يمكن مش بعرف ألون ولا احكي في الغرام لكن قلبي لسه يحلم يملأ العالم سلام وأنت جيتني في وقت ضايع وكأنك مسك الختام جيت تقولي أني عايشه ليكي روح عاوزة تحب أنت فيك حاجه غريبة فيك صدق وروح وقلب فيك مباديء لسه طاهرة في زمن نفاق وكدب فيك حاجات كتيرة حلوة كل عمري مشفتهاش فيك بساطه وصوت حنين كأنه غنوة مسمعتهاش صحي قلبي من مواته وكأنه عمره ما عاش واللي فات من عمري عدي عمر ضاع مني بلاش سيبك أنت ...... هي كده الأفكار بتشطح وتأخدنا دايما بعيد والسماء بتوهب وتمنح ويتخلق فينا جديد واللي كان مستحيل والي فاكرينه صعب يسهل بإرادة الحميد قلت يمكن مرة معاي الدنيا تصدق وقلت يمكن قلبي لسه يعيش ويعشق وخدتني أفكار كبيرة فكرة تسرق مني فكرة قلت يمكن أبقي عندك زي ما أنت برضو عندي قلت يمكن بكرة أحلي وعقلي بياخد ويدي قلت جايز أبقي ضحكة في عيونك وأبقي من الكون ده كونك وأبقي حرف في كلمة بتكمل بيها حروفك وأسكنك وأسكن في قلبك وأتحدي حيرتك وخوفك كل دي أفكار وجات لي وأنا قاعدة لوحدي أسرح قبل ما أعرف فين طريقك وقبل ما عيني تشوفك قلت يمكن ......
