قصيدة معلش يا زهر

كتب / احمد عكاشة
قام الشاعر محمد احمد إسماعيل إبن محافظة سوهاج بتأليف قصيدة معلش يا زهر . فالكلمة كفيلة على تغيير امة والتاثير عليها وتغيير مفهومها فنظرا لمستوى الغناء المتدنى الموجود على الساحة والأفلام الهابطة التى تدمر جيل كامل من الشباب يسعى معظم الادباء والشعراء عن تغيير مستوى التفكير بالكلمة ومخاطبة البسطاء من الشعب محاولة من الشعراء لتطييب خاطرهم والشعر العامى هو الذى يصل الى القلب والعقل معا ومعلش يا زهر

معلهش يا زهر
لسه معادنا ف آخر الشهر
ناكل مانجة و نشرب بوظة
و بقرش نكملها بلوظة
و نضرب صرمة ف وش القهر
……………
نتنطط على ضهر الدنيا
و نغني أغاني فساكونيا
و نرقص زي غجر مقدونيا
و نرمي سمك الخوف في النهر
……………
معلهش يا زهر
لسه معادنا ف آخر الشهر
حنجنن مراجيح العيد
و نسلم ع السما بالإيد
نتشعبط ورا حلم سعيد
و السر نبعتره في الجهر
…………….
معلهش يا زهر
لسه معادنا ف آخر الشهر
أيامنا البهتانة قديمة
هنغيرها بضحكة سليمة
و نحضن بدن النور في السيما
و نِعدِل بيه عَوَجَان الضَهر
………………
معلهش يا زهر
لسه معادنا ف آخر الشهر
شِبّ و شِبّ و شِبّ و شِبّ
و اخبط رجلك فين ما تدِب
و افرح إن سألوك.. بتحب ؟
أيوة باحب.. و حزني المهر
و لسه معادنا ف آخر الشهر