كتبت/الشيماء صلاح الدين
حقيقي من غيرفلسفة
انت اللى فى ايديك الشفا
وانت اللى بايديك الدوا
ياتعافى نفسك من جروحك
ياتعيش كأنك ماحى روحك
م الحياة بحقنة هوا
اصل الجراح
علطول هتفضل عايشة فيك
مبتتمحيش ومتتمسحش الا بايديك
فازاى هتمسح دمعتك
لويوم اديك متكتفة
علشان تخف من الالم
فضرورى تعرف كل قوانين الشفا
وضرورى تاخد درس حى من اللى فات
لوحد سألك عاللى جرحك قولة مات
فية ميتين عايشين وعايشين ميتين
وعشان تعيش جواك حاجات
بتموت حاجات
ساعة ماييجى الليل وتقعدفوق سريرك
بتشوف حاجات مايشوفها ابدا حد غيرك
وتبص على دخان سيجارتك عالحيطان
تلاقية بيرسم الف رسمة بتندهك
تنزل عنيك على مج قهوة بتشربة
وتلاقى فية تفاصيل كتيرة بتشبهك
تفتح بيبانك يمكن الدخان يروح
فعلا يروح
لكن يسيب جواك جروح
تسرح فى صورة بنت قلبك حبها
وتشوفها قاعدة مع القمربتونسة
وبتفتكراحلام بريئة حلمتها
وكل حلم بريئ غباءك دنسة
عايز تقول للصورة عاللى بيوجعك
خايف لترفض تسمعك وترجعك
فتشوف بعينك ذكرياتك كلها
الذكريات مبتتمحيش ولو اتمحت
مبتتمحيش من جدرها
لازم بيفضل شئ صغيرمنها
بس انت شوف
هتلاقى فية جواك رفوف
بتشيل عليها سنين حياتك ذكرياتك
فرحك وجرحك ضحكتك حزنك اهاتك
احاسيس بتاخد وقتها وتروح لحالها
وبييجي غيرها ياخد مكانة ف ذكرياتك
لوجرح جد بيوجعك والنارتقيد
ماطبيعي لازم يألمك علشان جديد
اما الجراح اللى اتنست واللى انتهت
تلاقيها تنزل تحت ف الرف البعيد
سايس امورك خلى احزانك تمر
وضرورى تضحك عالالم بالابتسامة
مفيش واحد بيموت ولسة ناقصلة عمر
لكن كتيربيموت وهوا ناقص كرامة
