كلمات : ضيا طحاوي
الغربة جوه منك مش مكانك
إنت إتخلقت تعيش
تسبح للي صانك
وبحكمته يخلق لروحك
معجزات
ويعز فيك ولا عمره هانك
الله جميل خلق الجمال
وصوره كله بوقارك
بلاش تمجد عبد
مخلوق من تراب
لتعيش وحيد بذنوب
علي إكتاف تنحني
يوم بعد يوم
حتي الندم ما تلاقي
وقت تفوت عليه
أو تلحقك موته بأونها
ما تلاقي فرصة تقول
يارب تروح إليه
الغربة توهة معششه
عند اللي ضل
مش طول مسافة
وعشان ترجع لنفسك وبسلام
ومن غربتك تتعافي
هات آخر الحكايات
وواجه دنيتك
متخافش م النهايات
بإيدك سطوتك
لو كل مرة هتبدأ من جديد
عافر…. غامر… وحقق رغبتك
إنك تكون متحرر م الخداع
وحياة مرسومة بإيد غريب
يحدد سكتك
الكون هايتغير عشانك
والدنيا تتبدل هوا
حتي الحياه تتلون بالفرح
والأمل يرسم حيطانك
بنور يدوس علي ضلمتك
الغربة جوه منك مش مكانك
انت إتخلقت تعيش
تسبح للي صانك
