زوجه انا بقالى سنه بناديك دكتور على ايه اللي استجد يعنى عن اذنك
هو ايه اللي حصل يا على وبتقول كدا ليه اه يظهر ان فى حاجات كتيرة حصلت منعرفهاش طب احنا عاوزين نعرف تعالوا بينا نشوف الحلقة الثانية والعشرون من قسمة على اتنين يارب تعجبكم
نهى على
مسلسل قسمة على إتنين
قصة وسيناريو وحوار / نهى على طه
الحلقة الثانية والعشرين
مشهد (1) صورة عامة للعاصمة الفرنسية
ــــــــــــــ قطع ــــــــــــــــ
مشهد (2) ليل داخلى منزل أخت نادين / حجرة نوم نادين
نادين جالسة فى منتصف السرير ممسكة بالموبايل تقلب فى ألبوم الصور التى تجمعها مع على
نادين تنظر لصورعلى وتبتسم فى شوق كبير وتطلق تنهيده كبيرة
نادين محدثة نفسها :
IMISSYOU MY LOVe so match
نادين تنظر لعقارب الساعة وفى حماس تطلب الرقم
نادين تسمع صوت الجرس وعدم رد
نادين فى نبرة تساؤل وشك :
معقولة نام هو متعود يكلمنى قبل ما ينام ومش عادته يخرج يسهر
ممكن يكون …
نادين تنفض هذة الفكرة من رأسها
نادين فى خوف وتأكيد لذاتها :
على بيحبك نادين … بيحبك بقوة دى أوهام سها إيه مهما عملت إنتى إللى جواه وخليكى واثقة فى نفسك أكتر من كدا فاهمة
نادين تضع الموبايل بجانبها وتطلق تنهيده قويه
ـــــــــــ قطع ـــــــــــــــ
مشهد (2) ليل خارجى / صحراء كبيرة
على واقفا ليلا فى صحراء كبيرة وكأنه تائها فيها
على يجد على مرمى بصره بعض النيران المشتعله … على يسرع تجاهها
على يجد فتاه بملامح سها ترتدى ثوب أبيض وشعرها الأحمر يتطاير منها تخرج من وسط النيران وتبتسم لها وتشير له
على ينظر لنفسه ويتجه كالمسحور ناحيتها
سها تنظر له بقوة وتضع وشاحها الأبيض على جسده ثم تختفى
ـــــــــــــــ قطع ــــــــــــــــ
مشهد (3) ليل داخلى / داخل قاعة شرقية من الطراز القديم العثمانى
على متضجعا على أريكة وثيرة مفروشة وكأنه ملك وحوله الخدم والجوارى
سها أمامه مرتدية ثوب أحمر داكن تضع حول وجهها وشاحا شفاف تنظر إليه بعينيها نظرة أنوثة وشقاوة عالية
سها تكشف عن وجهها وترفع عينيها لأعلى فتتساقط عليها أوراق الورد الأحمر وهى تتمايل بنشوة وليونة وجمال
على ينظر لسها فى شدوه وإنبهار وهى ترقص والورد يتساقط عليها سها تتقدم ناحية على وتنحنى أمامه
على يشد سها إليه وفى لحظة يضمها و…………
ــــــــــــــ قطع ـــــــــــــــــ
مشهد (4) نهار داخلى / فيلا بدر الدين / حجرة نوم على
على يستقظ على صوت المنبه
على يفتح عيناه ولدقائق ينظر للحجرة وإلى العرق المتصبب منه
على يطلق زفرة حارة
على محدثا نفسه فى حيرة وتخبط وعدم تركيز :
الله … الله إيه بيحصل دا معاك يا على كدا كتتير قوى بجد كل بنى أدم وله طاقة
الله يسامحك يا شاهر .. خلتها تظهر تانى ليه أنا مبقتش على … أنا مين
على يترجل من الفراش ويفتح دولاب ملابسه أخذا ثيابه والمنشفه ومتجها ناحية دورة المياة
ــــــــــــــ قطع ــــــــــــــــ
مشهد (5 ) نهار خارجى / فيلا بدر الدين / حوض السباحة
وليد واقفا أمام فريال ينظر إليها بإستنكار
فريال تنظر لوليد فى حدة
فريال فى تصميم :
أنا قولت إللى عندى لازم تشتغل حتفضل عاطل لحد إمتى إنت مبقتش صغير
وليد فى إستنكار :
أشتغل … ليه أنا عندى فلوس ومش محتاج
فريال ساخرة :
يا تتو … يا تتو يا حلاوتك يا جمالك خليت للخايبين إيه جتك وكسه
وليد فى ضيق :
الله وبعدين مش قولنا نبطل طوله لسان
فريال ترفع سبابتها أمام وجهه وفى تهديد :
والله يا وليد إما حطيت عقلك فى رأسك وفوقت من الضياع إللى إنت فيه ما حستنى ولا أكمل معاك ومن اللحظة دى مفيش فريال إللى لما تشتغل وتبقى راجل ومسئول
شاهر بيه الله يرحمه كان يوزن منك عشره وفلوسة زى الرز ومع ذلك كان شغال وعينه وروحه الشغل ودكتور على أهو .. إشمعنى إنت عاطل بالوراثة
وليد فى إنفعال :
وأنامالى ومالهم كل واحد حر فى حياته
فريال تهز رأسها وفى غضب وتهديد :
حلو قوى إستبينا كل واحد حر أنا مبقعدتش مع عطالين مبيشتغلوش خليك على راحتك وأنا على راحتى وإللى بينا ينتهى ونخلص
وليد فى عناد :
طب مش حخلص وحسيبك كدا ومش حشتغل
فريال ترمقه بقرف وتتركه وتنصرف
على واقفا داخل الشرفة يتحدث فى الموبايل وقد شاهد الشجار
ــــــــــــــ قطع ــــــــــــــــ
مشهد (6) نهار داخلى / فيلا بدر الدين / حجرة نوم فريال
فريال جالسة على الفراش تبكى بحرقة وسها بجوارها تربت على كتفها
سها فى نبرة إشفاق :
كفايا يا فراولة إهدى بقا
سها تطقطق وفى عدم فهم :
ما يشتغل ولا إن شاء الله عنه ما إشتغل حارقة نفسك كدا ليه
فريال فى نبرة صادقة وعفوية :
عشان بحبه بجد وعاوزاه يبقى كويس ومش أنا الست إللى تقبل إن جوزها يبقى عاطل
سها فى نبرة دهشة قوية وذهول :
جوزها وليد جوزك إمتى ؟
ـــــــــــ قطع ــــــــــــ
مشهد (7) نهار خارجى / فيلا بدر الدين / حوض السباحة
على واقفا أمام وليد وفى نظرة دهشة كبيرة ونبرة ذهول وإستنكار :
مراتك …. إتجوزت فريال … فريال من إمتى ؟
وليد فى غير إكتراث لموقف على وهو ينفث دخان سيجارته :
من كام شهر كتبنا ورقتين وإتنين شهود وإتفقنا إن جوازنا نخليه مش معلن ونشوف نفسنا إذا طلع جوازنا دمه خفيف ومتفقين نعلنه طلع رخم دمه تقيل مفيش مشكله باى باى وكل واحد يروح لحاله
على يهز رأسه فى وينظر إليه فى تهكم وفى سخرية كبيرة :
وياترى يا جميل جوازك طلع دمه خفيف ومسكر وعسل أبيض ولا إسود
على فى توبيخ وتعنيف :
بذمتك مش مكسوف من نفسك وعمايلك إنت مبقتش صغير وبعدين فريال دى مناسبة ليك ؟
وليد فى دفاع وشىء من التهكم :
مين إللى بتكلم قدامى على أخويا ولا يسرية الدراملى
أعتقد زمان إن واحد إتجوز من وراء أهله برضوا وبرضوا ماكنتش مناسبة ليه بس كان بيحبها
وأنا كمان بجد حبيت فريال عارف ليه عشان ملقتش أطيب ولا أحن ولا أجدع منها فى الدنيا ميغوركش المظاهر يا دكتور
على يبعد نظره عن وليد وفى محاولة لدفاع عن نفسه :
أنا مبنكرش إنى عملت كدا بس كان ليا …….
وليد يقطع حواره وفى نبرة نصح :
من غير لكن ولا بس مشكلتك إنك عاوز كل حاجة يا دكتور خلى بالك
قبل ما السعادة فعلا تتسرب من بين إيديك ومتعرفش تعوضها تانى عن إذنك
وليد يترك على ويتجه ناحية الفيلا
على ينظر فى شرود وتفكير
ــــــــــــــ قطع ـــــــــ
مشهد (8) نهار داخلى / فيلا بدر الدين / المطبخ
سارة واقفة مع فكرية تحضر طعام الإفطار
سها تسكب الشاى فى الفنجانين
سها تنظر لسارة وتبتسم فى سرور وفى تشجيع :
الله ينور يا ساره إحنا إتقدمنا خالص
سارة فى سرور :
الفضل ليكى إنتى وفراولة هى فين ؟
سها تزفر زفرة صغيرة وفى نبرة خفيضة :
تعبانه وقالت مالهاش نفس
سها تبرطم فى خفوت :
الله يسامحك يا فريال دى عملة تعمليها
ــــــــــــ قطع ــــــــــــــــــ
مشهد (9) نهار داخلى / فيلا بدر الدين / ركن المائدة :
على جالسا حول المائدة يأكل فى صمت سها جالسة فى المقعد المقابل وكذلك سارة
الموبايل يرن على يبتسم وفى سرور بالإنجليزية
عزيزتى / حلوتى
سها تزفر فى ضيق مكتوم
على ينظر نظرة خاطفة لسها ولكنه يحافظ على هدوئة :
ليه نادين إنتى مش قولتلى إنها بقت أحسن وجاية قريب
سها تقوص حاجبيها وتنهض وتترك المائدة وتخرج من الفيلا
سارة تهز رأسها وفى خفوت :
دا وقته يا نادين
على يلاحظ إنصراف سها وفى نبرة إنفعال :
براحتك يا نادين بس أنا كدا تعبت بجد
على فى نفس الإنفعال :
أوكيه لأ خدى راحتك مع السلامة
على يغلق الموبايل وينظر لسارة ويلقى بالموبايل بعيدا وفى ضيق :
مش عارف الواحد يرضى مين ولا مين عيشه تخنق
سارة تنظر لأخيها وفى هوادة :
براحة يا على كتر الخصام بيولد جفوه وساعات قسوة ودا بيخسر كتير
سارة تنهض وتترك المائدة
على يخبط سطح المائدة فى غيظ بيده ويزفر فى ضيق
ـــــــــــــــ قطع ـــــــــــــــــ
مشهد (10) نهار خارجى / فيلا بدر الدين / الجنينة
سها واقفة بالقرب من شجرة مستندة إلى جذعها
علامات الكأبة على وجه سها والإحباط
على يتقدم ناحية سها ويتنحنح
سها تنظر نظرة سئم مفتعلة وفى نبرة هدوء جاد:
فى حاجة يا دكتور على ؟
على ينظر لوجه سها وفى لحظة يخرج من وجهها صورة سها التى شاهدها فى منامه
على يتراجع برأسه قليلا للوراء ويعدل منظاره
سها تلاحظ حركاته سها تكتم ضحكتها وفى دهشة ضاحكة :
فى حاجة يا دكتور ؟
على يقف أمامها وفى إنفعال لا إرادى لا يعرف سببه :
دكتور على .. دكتور على إيه فى واحدة يتقول لجوزها يا دكتور مش معقول إحنا قدام الناس زوجه وزوجه يعنى سها وعلى ولا إيه ؟
سها تبتسم وفى سخرية وعتاب حزين :
أنا بقالى سنه بقولك يا دكتور على .. إيه إللى إستجد
على فى نفس الإنفعال المضطرب وهو ينظر لعينيها خائفا أن يستسلم :
فى إنك تقولى يا على زى ما أنا بقول سها
مفهوم
سها تنظر لعلى وفى عينيها نظرة عتاب وشجن كبيرة وفى نبرة خفيضة :
عن إذنك أشوف إللى ورايا
سها تترك على وتنصرف
على يتابع سها فى نظرة حزينة
ــــــــــ قطع ـــــــــــــ
إلى اللقاء فى الحلقة القادمة إن شاء الله
يتبع …………….
