فكره رائعه لمطعم بالمنوفيه تداولها رواد الفيس بوك

مطعم فاتح جديد اسمه الف ليله وليله في شبين الكوم- محافظه المنوفيه
روحت له .. جبت وجبه حلوه .. وانا بتكلم مع صاحب المحل لفت نظري اللافته اللي محطوطه في الصوره المرفقه ( من لم يستطع شراء الطعام فاليأخذ بالمجان فهذا مال الله) ..

بقول لصاحب المطعم هل فعلا بيجي ناس غلابه ياخدوا منك بالمجان .. قالي اه .. قلت والله حاجه كويس بدل ما ترمي الاكل اللي بيفيض اهو الغلابه يستفادوا منه .. قالي لا والله دا احنا بنديهم من الاكل النظيف اللي الزبون العادي بياخد منه وفي اي وقت بنديهم .. وقالي (لَنْ تَنَالُوا الْبِرَّ حَتَّىٰ تُنْفِقُوا مِمَّا تُحِبُّونَ ۚ وَمَا تُنْفِقُوا مِنْ شَيْءٍ فَإِنَّ اللَّهَ بِهِ عَلِيمٌ).

قالي مش كده بس دا فيه ناس لما لاقونا كده شجعونا وبدءوا يدفعوا فلوس من الصدقات والزكاه للمطعم عشان يدي اي واحد غلبان من غير ما ياخد من الغلابه فلوس .. قلت والله حاجه عظيمه .. انتظرت عشان الشيف بيعمل الوجبه بتاعتي الكلام دا كان واحده بالليل ..

وانا قاعد جنب صاحب المطعم.. لاقيت واحد غلبان بس لابس نظيف 😀 بس باين عليه فعلا انه غلبان ومكسوف يجي لاني كنت قاعد.. فصاحب المحل قاله تعالي ما تتكسفشي .. قاله عاوز تاكل ايه؟ وفعلا اداه والله اللي الغلبان عاوزه سندوتش فراخ محترم 😀 والغلبان بقي كل شويه يقول للشيف انا عاوز كاتشب .. انا عاوز كيس كبير شويه .. والشيف صبور جدا معاه .. وانتهي الموضوع ومشي .. وانا طبعا قاعد بتكلم مع صاحب المحل .. شويه جاء شاب جميل اووي وفي عمري تقريبا نزل من عربيه … بيقول لصاحب المحل.. هل فعلا انتم بتطلعوا اكل للغلابه من غير ما تخدوا منهم فلوس زي ما انتم كاتبين؟ قال له نعم فعلا .. وانا قاعد قلت له فعلا لسه واحد غلبان واخد سندوتش مجاني .. المهم الشاب الجميل دا طلع 200 جنيه وقال لصاحب المحل فكها .. واعطي صاحب المحل من ال 200 جنيه 150 جنيه .. وقاله اي واحد غلبان يجي لو سمحت ادي له طعام مجاني..طبعا انا صورت الحاجات دي وقلت اتصور بنفسي جنب اللافته عشان محدش يقول دا المطعم دا في اي بلد تاني اللي ممكن فعلا يكونوا بيعملوا كده .. بس دا في مصر … طبعا انا قعدت اتكلم مع صاحب المحل ما يقرب من ساعه .. انا حبيت والله انشر الحاجه دي لانها حاجه ايجابيه في مجتمعنا ونفسنا نشوف معظم المطاعم .. بل نفسنا نشوف حاجات كتير مش في مطاعم بس .. مصر فيه خير وفيها امل وفيها ناس طيبه كتير ..
شكرا الف ليله وليله ….