لوحتي لإبنتي الدكتورة
“” ساره “”
” كان نفسي أكون ساحر
واملك تعويذة الفرحة ..
” كنت اصنع خيوط من ورد
واغزلك بإيدي الطارحة ..
” وابنيلك ف قلبي قصر
وازرعلك جناين طارحة ..
اللوحة
:: الموناساره ::
………………………………….
إوعى تقولي
إن أنا
مش فاهمك ..
أو مش حافض
تقاطيع وشك ..
لما زمان
ف اللفة
شالوكي ..
قوام
وجابوكي ..
وقالولي
دي بنتك ..
وشوفت عيونك ..
جيبت الفرشة
والألوان
وبسرعة رسمتك ..
واتخيلتك ..
أجمل وردة
ف البستان ..
أصل أنا فنان ..
والرسم هوايتي ..
وبافهم لغة
الألوان ..
مثلا يعني
أقدر اقولك
على لون
فرحك ..
وكمان
لون حزنك ..
ولونك
وانتي عيونك
سارحة ف كونك ..
وكمان الحلم
الغافي
ف حضنك ..
عارف لونه..
حتى جنونك ..
همسك
شجنك ..
واجمل لون
بيليق
على وشك ..
وبيرسم
ضي النور
ف ملامحك ..
حتى القمر
العالي ..
لو شاف
ألواني
ف ضيك ..
هايغير منك ..
وينزل طوالي
ويقول وانا مالي
هات ألوانك
يالا ارسميني
شوفتي عيوني
ازاي شايفاكي ..
وبألواني
رسمت هواكي ..
وقدري معاكي ..
إنك
ف كياني ..
ساكنة كياني
زي الوشم ..
وانا من صغري
باحب الرسم ..
وحب الألوان
ف حياتي غريزة ..
آه لو شوفتي
بعينك لوحتك ..
هتحبيها ..
دانتي وبس
ف عيني عزيزة ..
حتى دافنشي
لو شاف
تفاصيلك فيها ..
هايقول
ياخسارة
الموناليزا ..
هايقول .. ياخسارة .. الموناليزا ..
…………………………
بقلمي ..
معوض حلمي
منشأة بطاش
تمي الأمديد
دقهلية
سارة معوض حلمي طالبة في السنة الخامسة كلية الطب بجامعة المنصورة
