عارف انتى بتحبينى قد ايه وبتعذبى قد ايه

عارف انتى بتحبينى قد ايه وبتعذبى قد ايه
اوعى تكونى فاكرانى مش حاسس او انى انسان قاسىى بس انتى ظهرتى فى توقيت غلط
صراحة على موقفه صعب بجد والحيرة قاتلاه يا ناس
طب انت لوومكانه تنصحه بإية ولو مكان سها تعملى ايه طب اقولكم تعالوا نشوف ليه قال كدا ونتابع الحلقةةالسادسة عشرة من مسلسل قسمة على اتنين
يارب يعجبكم
نهى على

مسلسل قسمة على إتنين
قصة وسيناريو وحوار / نهى على طه
الحلقة السادسة عشرة
مشهد (1) ليل داخلى / فيلا بدر الدين / بوابة الفيلا الصغيرة
وليد وفريال يدخلا وليد يكاد يترنح
فريال تلاحظ الأنوار المضائة
فريال فى تساؤل وقلق :
وليد هى الدنيا صاحية ليه كدا
وليد ينظر نظرة زغلله وفى غير إكتراث :
صاحية ولا نايمة دى عالم مالهاش لازمة و….
فريال تحذره وتضع يدها على فمه :
هششش فى حد نازل
فريال تلمح على مترجلا على السلم والمعطف الثقيل على جسده ومعه الطبيب
فريال تقف فى ركن هى ووليد
على لم يلاحظ وجودهما وعلامات القلق واضحة عليه والطبيب فى نبرة هادئة لكنها جادة :
الضغط زى ما قولت لحضرتك إرتفع مرة واحدة وأعتقد إن السبب ضغط عصبى شديد واقع عليها
على ينظر لطبيب ويهز رأسه فى شىء من الجزع
الطبيب يناول على روشته التعليمات وفى تحذير :
ممنوع الأكل عليها بدسم أو ملح دا بالإضافة ممنوع عليها الإنفعال وياريت تحاول تغير جو شىء مستحب ليها
ألف سلامة
على فى هدوء :
متشكر يا دكتور
على يوصل الطبيب ويغلق الباب
فريال تسرع ناحية على وفى خوف وهلع :
سها مالها يادكتور ؟
على ينظر لسها وفى نبرة متحشرجة :
ضغط الدم إرتفع مرة واحده وحصل لها إغماء وزى ما سمعتى
فريال تسرع ناحية السلم
على يستوقف فريال وفى نفس النبرة :
الدكتور إداها حقنه مهدئة حتنام لحد الصبح
فريال تنظر لعلى وفى حب وإخلاص :
قاعدة معاها مش حسيبها دا أختى يا دكتور إحنا مالناش إلا بعض عن إذنك
ـــــــــــــ قطع ـــــــــــــ
مشهد (2) ليل داخلى /فيلا بدر الدين / حجرة نوم على ونادين
على ونادين راقدان على السرير نادين غارقة فى النوم تضع رأسها على ذراع على
على ينظر لوجه نادين النائم ويبتسم إبتسامة حانية
على يتأمل وجه نادين الرقيق ونظرة شرود
ـــــــــــ مزج ـــــــــــ
مشهد (3) نهار خارجى / فلاش باك / شاطىء البحر / صخره كبيرة
على جالسا بمفرده على الصخرة الكبيرة ينظر لأمواج البحر فى شرود وحزن شديد
على يقوم برمى الحصى الصغير فى الماء فيهتز على يطلق تنهيدة طويلة
على يسمع صوت رخيم فى حنان يقول :
على
على ينظر فيجد وجه نادين النقى الرقيق وإبتسامتها العذبه ونظرة حب علنية
على فى نبرة سعيدة بها رنة الشجن :
نادين
نادين تجلس بجوار على .. على يحاول إبعاد وجهه عنها
نادين تقرب وجهه منها وفى حنان صافى :
متبعدتش عيونك عنى إنت فى نظرى أحسن إنسان فى الدنيا فاهم
على فى نبرة بها رنة الكسرة :
أنا منفعكيش يا نادين ولا إنت ولا غيرك
نادين فى تشجيع وحب ومثابرة :
مين قال كدا أى حد فى الدنيا معرض إنه يكون مكانك محدش يعرف إللى مكتوب ليه
وبعدين أنا عارفة إنك بتحبنى الهروب مش حل يا على
على فى ضيق :
دى شفقة وأنا مش حقبل دا
نادين تضع كفها على وجنته وفى صدق :
دا حب وحب قوى كمان أنا مش حتجوز غيرك ومش عاوزة أكون أم ياما ناس إتجوزوا وخلفوا وأولادهم كبروا وحياتهم كانت مملة وحزينة ومش سعداء إيه فايدة إنى أكون أم وعندى ولاد من راجل مش بحبه أنا شفت دا عن تجربة أونكل كاظم عمى ماكنش عنده أولاد هو وأنت شهرت ومع ذلك فضلوا يحبوا بعض لحد أخر يوم فى عمرهم وأنا بحبك … بحبك على
على ينظر لنادين ويبتسم فى حنان
نادين فى حب وشىء من الجرأة تعانق على وفى لهجة غرام وحنان :
إنت حبيبى وبس .. عاوزاك إنت على
ــــــــــــــ قطع ـــــــــــــــــ
مشهد (4) ليل داخلى فيلا بدر الدين / حجرة نوم على ونادين
على يفيق من ذكرياته ويداعب بأنامله وجه نادين النائم ومحدثا نفسه :
أنا كمان بحبك قوى يا نادين وسعيد معاكى جدا إنتى أكتر من رائعة
على يحاول أن يغمض عيناه وينام ويطلق زفرة طويلة حائرة ثقيلة
ــــــــــــ قطع ــــــــــــ
مشهد (5) ليل داخلى فيلا بدر الدين / حجرة نوم سها
سها راقدة فى الفراش نائمة وعليها الغطاء الثقيل
فريال جالسة على مقعد الفوتية وعليها غطاء ثقيل وقد غلبها النوم
فريال تسمع طرقة صغيرة على الباب فريال تنتبه وتفتح عينيها وتنهض
فريال تنظر ناحية سها النائمة وتتجه ناحية الباب وتفتح
فريال فى دهشة وشىء من السرور :
دكتور على حضرتك منمتش إتفضل
على يدخل ويتجه ناحية سرير سها وينظر إليها بوجه حزين وفى صوت خفيض متساءل :
إيه الأخبار ؟
فريال فى شجن ونبرة تأنيب خفيفة :
زى ما هى واضح إنها إتحملت الفترة إللى فاتت حاجات كتيرة ضغطت عليها وكل واحد ليه طاقة الحمد لله على كل شىء
فريال فى طلب :
دكتور على خلينا نمشى من هنا ونروح شقة شاهر بيه وأنا أوعدك إن مفيش حاجة تزعلك منها تانى
على يطلق تنهيدة وفى نفس النبرة الخفيضة :
مينفعش يا فراولة
روحى إرتاحى شوية أنا حقعد جنبها كدا كدا الفجر قرب يأذن إتفضلى
فريال تنظر لعلى وتهز رأسها وتخرج من الحجرة
على يتجه ناحية سرير سها ويجلس بالقرب منها
على ينظر لوجه سها المتعب النائم ويلتقط كفها ويطبع عليه قبلة رقيقة حانية
على يربت بكفه على شعرها فى حنين
على يبتسم إبتسامة حزينة وهو يتأمل وجهها ونظرة شرود
ــــــــــــ مزج ـــــــــــــــ
مشهد (6) نهار خارجى / منطقة الأهرام (فلاش باك)
على جالسا عند الهرم الأكبر محتضنا سها من ظهرها
سها جالسة وقد مدت ساقيهّا أمام وجهها سها تنظر لعلى نظرة هيام شديدة
على يداعب بعظمة وجنته بشرتها ويطبع على كفها قبلة ناعمة :
على فى همس وتساؤل :
بتحبينى يا سها
سها ترفع عينيها وتنظر لعلى نظرة مليئة بالغرام الشديد
سها فى همس وشقاوة وحرارة عالية :
لأ مش بحبك … أنا بعشقك عشق … أنا جيت الدنيا دى بس عشان أحبك يا على
حبى ليك يمكن قبل ما إتولد أو بعد ما حموت الله أعلم بس الأكيد إنك أول حاجة وأخر حاجة الروح إتمنتها وطلبتها بعشقك
على يحتضن سها بقوة ويخلع لها ضاحكا الأيس كاب التى كانت ترتدية فتضحك ويضحك هو
ــــــــــــ قطع ــــــــــــ
مشهد (7) ليل داخلى / فيلا بدر الدين / حجرة نوم سها
على يفيق من هذة الذكرى وملامح وجهه مليئة بالحنين والألم
على ينظر لسها ومحدثا فى صوت هامس :
عارف إنك بتحبينى قد إيه وتعبانه وبتتعذبى إوعى تكونى فاكرانى عديم الشعور والإحساس لأ يا سها … بس إنتى ظهرتى فى توقيت غلط توقيت أنا كنت خلاص نسيت وقولت إنتى كمان نسيتى والحياة خدتك
على يرفع رأسه للسماء وفى تضرع وألم :
قوينى يارب على الإختبار … إمنحنى القوة والصمود عشان الأزمة دى تعدى إن شاء الله
على يطبع على جبين سها قبلة حانية وينهض ويخرج من الحجرة
ـــــــــــ قطع ــــــــــــــ
مشهد (7) نهار خارجى / ضوء الشمس وصورة عامة للخضرة فى جنينة بدر الدين
ــــــــــــــــــ قطع ــــــــــــــــ
مشهد (8) نهار داخلى فيلا بدر الدين / حجرة نوم سها
سها راقدة نصف جلسة على الفراش وفريال جالسة قبالتها وهى تناولها الدواء
فريال فى نبرة دفاع :
والله حرام متظلمهوش حقيقى كان قلقان عليكى دا جه بنفسه وقعد جانبك وبعدين بيجى الصبح يسأل عليكى كل يوم
سها فى نبرة حزينة يائسة :
عادى .. أنا زيه زى أى حاجة فى البيت لو دادة فكرية تعبت حيسأل عليها قولى يا باسط
سها تغير مجرى الحوار وتسأل :
خالد وأدم فين ؟
فراولة مطمئنة :
راحو المدرسة
سها فى تساؤل وقلق :
النهاردة عندهم إمتحان أنا مراجعتش معاهم
فراولة مطمئنة :
ممكن تهدى وبلاش توتر سارة ربنا يخليها راجعت معاهم متخافيش ودكتور على كمان وبعدين النهاردة أخر يوم فى إمتحانات الترم إرتاحى وبطلى تفكير
سها تصمت
فريال تنهض وفى نبرة عادية :
حروح أشوف سارة عاوزة إيه وأجيلك دى زعلانة خالص هى ووليد ولو عليهم عاوزين يدخلوا كل شوية يقعدوا معاكى بس أنا بقولهم بلاش على الأقل اليومين دول ترتاحى بس
سها تبتسم وفى خجل وسرور :
كتر خيرهم روحى أنا كويسة متقلقيش وإخرجى وإتبسطى متربطيش نفسك بيا أنا بقيت أحسن
فراولة تهز رأسها وتخرج من الحجرة
سها ترجع ظهرها وتسندها إلى الوسادة
سها تسمع طرقة على الباب
سها فى هدوء :
إدخل
نادين تدخل الحجرة
سها تعتدل جلستها وتقوص حاجبيها
نادين تدخل وتغلق الباب وفى نبرة باردة :
سلامتك يا سها جيت أطمن عليكى
سها فى إقتضاب :
شكرا
نادين تجلس على المقعد المقابل للفراش وتنظر إليها فى كراهية علنية سها تبادلها نفس نظرتها وأكتر
نادين فى نفس البرود الذى يخفى ورائة الكيد والتقليل من شأنها :
الدكتور قال إن جالك الضغط خلى بالك من روحك أصل الضغط دا حبيبتى مش بيجى إلا بالتفكير طبعا كلنا بنفكر بس فى حاجات الواحد لما يفكر فيها بتبقى مضيعة للوقت ومتعبه لأن تحقيقها محال
سها تعتدل جلستها وفى لهجة مباشرة :
دكتورة نادين من غير لف ولا دوران عاوزة إيه ؟
نادين تبتسم فى سخرية مفتعله وفى نفس البرود والكيد :
عاوزة أنصحك أنا مقدرة إنك لسه صغيرة وحلوة وإتعودتى على الحياة الزوجيه
وعشان كدا إنتى ممكن تلغى الصفقة وأوعدك إن فى مبلغ كويس جدا تاخديه وتروحى تعيشى حياتك بقا بالطريقة إللى تعجبك تتجوزى شاب فى سنك تكملى حياتك معاه أو إنك تنسى خالص فكرة إن على جوزك وتكملى المده وتاخدى حقك وباى باى
سها تنظر لنادين نظرة طويلة كلها قرف لكنها تصمت وتنصت للنهاية
نادين فى نبرة ثقة كبيرة :
على مبيحبش غيرى فى الدنيا ومفيش أى ست مهما بلغت من جمالها وذكائها قدرت تلفت نظره عشان أنا جواه واثقة ومتأكده من دا
هو زمان حكى لى عن واحده كان بيحبها
سها تلتفت وتنظر لنادين فى إهتمام شديد
نادين فى نبرة عادية :
وأنا خليته نسيها فى مدة بسيطة جدا وقالى بعدها إن أى حاجة قبل نادين هاشم فى حياته فهى مراهقة ومفيش بعد نادين حد فى قلبه فقولت أجى أنصحك لانك صعبانة عليا جدا خصوصا لما تعبتى
سها تحاول كتم دموعها والحفاظ على ثباتها :
خلصتى كلامك طب إسمعى إللى عندى
عمرك ما حترتاحى يا نادين أبدا مش هو معاكى نايم فى حضنك شايفاه وشايفك لكن إنتى مشفتيش إللى جوا قلبه ميعلمش بالقلوب إلا ربنا سبحانه وتعالى
وإفتكرى كلمتى عمرك ما حترتاحى ولو سمحتى إتفضلى أنا عاوزة أرتاح
نادين تنهض وعلى وجهها الغل وفى توعد وتحدى باللغة الإنجليزية :
خدى بالك وإفتكرى إنى حذرتك
وأما نشوف الدكتورة نادين هاشم ولا سها مراد
ـــــــــــــ قطع ـــــــــــــ
إلى اللقاء فى الحلقة القادمة إن شاء الله
يتبع ……………..