بقلم : إلهام عفيفي
ياضحكة نايمة تتوجع
وقايمة الصبح تتناهد
واحنا ف عز ألمنا بنجاهد
عشان الدنيا ماتسواش
ولو قلنا ياريت بكره يكون اجمل
اهو بنضحك على الضحكة
بصوت موجوع و مش مسموع
ولسه سنيننا مفجوعة
ماحلتناش
تمر سنين وبنعدي جبال المر
ونتحمل جراح .. أحزان
ونتحايل على همومنا تطيب وتمر
ونهر دموعنا بيغرق صحاري الروح
وقافلة قلبي ع الآخر
ولا باسمح له مرة يبوح
وبتحايل على الدمعة
عشان تعتق بقا عيني
وأقول يمكن سكوتي يوم
ح يبني لي جدار أقوى
وكل اللي هنا استقوى
يخاف مني
ويحسب انني فتوة
عشان اخفي نقط ضعفي
لباقي العمر
