أنا مين فيهم .. أنا محتارة
هو أنا أعرفهم ولا معرفهمش !!
أيوة .. أنا اللي بمائة شخصية في بعض
أنا صندوق مليان قصاقيص
أنا درس وقصه .. غنوة ومووايل
أنا اللي مش بتكلم عن نفسي ..
بس بحب اللي يمدحنى ويشكرنى ويتغزل في محاسني
وأرجع أتكسف من تانى و أتداري ..ومحبش حد يشوفنى
أنا البنت اللي وقت الجد بمائة راجل ولايهزنى ريح
وفي وقت اللعب بحب الهزار و الضحك والمراجيح
أيوه رقيقة و كلي مشاعر و احساسيس
بس بدوس اللي يفكر يجرحنى .. ولا كأنى في يوم سمعته أو شوفته وكلمنى
وأرجع من تانى أسامح كل اللي جرحني …
بكلمة ونظره أنسي أنه في يوم زعلني
ولا كأن في يوم أذانى أو ذبحني
ماهو أنا قلبي ده دايما تاعبني يا ناس ملوعني
وفي ثانيه بقلب علي الكل .. يالهووي ما أنا كنت زي الفل
وبعد ماكنت البلسم لكل روح بتروح
ابقي سكين بيجرح وبيأذي وأنا اللي مجروح
أنا ضحكة عالية بجنون في وقت السكون
أنا الهادية العاقلة لما الضحك يقلب مجون
أنا شخص طيب وحنون ..
غضبي بيوصل أوقات حد الجنون
أنا زى البحر كله سحر مليان غموض
في رقة النسمة في ليالي الصيف ..
فرحة وضحكة مخبيه جواها دموع
اللي شافنى بيحسدنى.. ومش عارف أن القلب كله جروح
لا عمرى إشتكيت .. وجروحى لملمتها وأتداريت
محدش شاف دمعتى.. شافو منى بس بسمتى
لو شالو الوش هيلاقوا ليا ألف وش وش
أنا مين فيهم في كل الوشوش
تعبت منهم كلهم .. أنا عايزه أبعد وأستخبي جوه كهف مهجور
لا حد يسمعنى ولا عين تشوفنى ..
أعبد ربي وأقيم فرضى
اتطهر من ذنبي .. دمعى يغسل همي ..
انا بس ونفسي
وهوبا .. المارد المجنون يطلع ويطلع أجمل ثوب
وأرجع تاني وسط ناسي و أحبابي
أضحك و أفرح من تانى
بجد تعبتينى يا نفسي مش عارفه أبعد منك و أروح علي فين
