بقلم / خالد الترامسي
يا خبر تمشي تلاقي لوحة إلكترونية تعلن عن تعداد سكان مصر المحروسة ، حماها رب العباد وكفاها عيون الحساد ، أه ربنا يحميها من الحسد والعته والبلاليكا ، دا ٩٠ مليون في عين العدو ، قال يعني خلاص العدد ده بقي مصدر قلق وخراب لمصر ، وبيهدد النمو فيها ، شالله يوقف نموهم ، يا رب يجلهم حصبة وميلقوش ملابس حمرة يلبسوها زي ما هما مصدرين لينا الهم والنكد ، ولا رفع الدولار إللي قرب يجيب ال ١٢ جنية ، وخلي كل حاجة في البلد غالية ، بس مش غالية مرات محمود أبو إسماعيل ، دي غالية مرات الأخ محافظ المدعوكة إللي يا رب تدردك فوق دماغة ، إللي مِعَيش الناس القلق والهَم بنظرياته الحزمبولية إللي هتودي البلد في ٦٠ داهية ، الدولار كان بتسعة جنية ونصف ، وبيصرح إن الدولار هيبقي بأربعة جنيه ، طيب من اين يا ننوس خالتو ، ويا عيون غالية طيب يا تري الست غالية مراتك مبتقولش ليك سعر اللحمة بقي بكام ؟! ، ولا الجوافة إللي بقت بستة جنية واللي ملهاش علاقة بالدولار لا من قريب ولا من بعيد ، يا ريت الست غالية تديك قلمين علي قفاك ، ولا تحبسك في البيت يمكن حال البلد يتعدل ، دا أنتي تلقيك جبتلها العصبي و جننتها أكتر ما هي مجنونة ، طيب يا أخي لما تتكلم متبقاش تأفvورها أزيد من اللازم ، وتقول تصريحات تخليك مهزقة ، وتخلي مراتك تروح النادي حطه وشها في الأرض من الكسوف ، بقي ينفع كدة ، أنا مش عارف الأسس العلمية إللي أنت شغال بيها عشان تقول الكلام ده ، والله لو إنت شغال بالبركة مش هتقول الكلام ده ، ولا حتي واحد علي مية منه ، يا أخي دا إنتي جبتلي حول وأنا بقرأ كلمة الأربعة جنيه دي ، ولا كلمة تنزل ، عموما ربنا يسمحك يا عم المحافظ ، يا رب تقلب علي غفير ، علي الرغم إنك لو قلبت غفير يمكن يكون أفيد للبلد أصل عملك الذهني جاب البلد لورا أما عملك المادي تمسكلك عصاية ولا بندقية رش يمكن تعرف تحمي المكان إللي هتقف تحرسة ، حتي لو موت لك كام واحد بالغلط أهما برضوا هيستريحوا من أرف الأخطاء اللي عملتها بسياساتك الغلط .
ولا تمشي برضوا تلاقي يافطة إلكترونية تعلن حجم الواردات والصادرات ، صدرنا لنيكا رجوا طن كوسة وصدرنا لفينزويلا أتنين طن قرع ، وإستوردنا من الهند ٢٠ فيل ، ومن السعودية ١٠٠ معزة ، طيب لما الحركة ماشية كدة أُمال إيه الأَرَف إللي معيشينا فيه ده ، مالدنيا ماشية أهه وزي الفل ، ولا فيه كحرتة ولا يحزنون والناس بتاكُل لحمة معيز وحنيز وبيركبوا أولادهم الأفيال ، طيب هتطمعوا مينفعش كدة يا جماعة .
أتمني إننا نلغي الحاجات دي عشان المجتمع مش ناقص، معيشينه وَهْم الدولة التي تأخذ بالحداثة والأساليب العلمية اللولبية ، والناس مش لاقية تاكُل ، طيب وفروا الكام يافطة دي ، اللي هي مش موجودة في القاهرة بس دي بقت موضة وموجودة في كل محافظات مصر ، قال يعني من كتر الفلوس ، طيب أُمال تقشف إيه إللي بتكلمونا عليه ، طيب متتقشفوا علي دي ، يمكن توفروا بيها ثمن كام علبة لبن من بتاع الأطفال ، ويا ريت تدوا الدعم بتاع لبن الأطفال ده دعم نقدي عشان اللبن اللي بتجبوه بيجيب أمراض ، ولا إنتوا مش عارفين ده ، طيب إنتوا مش متعمدين ؟ يمكن عاوزين تخفوا من الشعب شوية .
أتقوا الله واللي مش قادر يسد في مكان يخلي عنده دم ويسيبه طواعية ، وطواعية ليه هو مش المفروض في ناس بتحلل أدائه ، ولا بتحللوا له حاجة تانية ، هههههههه ، طيب أهم حاجة حللوا له في معمل محترم ليجيلو تلوثات .
