شعر : عطية شواش
شفتك مابين السطر والتاني
وسمعت صوت الرعد في وداني
ساعة ماحز النحر في تورك
ماتت زهورك
قلت انا التاني
دبيت بإيدي جوه سياله
طلعت حاله من ميتين حاله
من امتي كان الأكل بحواله
زي الكلاب الصبح بنعاني
صح الكلام ولا الكلام قله
دا شعب ماينفع معاه إلا
ابره وفاتله وخيطه في الباط
واحسب حساب الجمع والشله
داست عليك الجزمه أم رباط
احنا اتقهرنا مش من القله
رقص الغواني
واسألوا الخياط
عبينا كل الهم في الزلعه
شفت اليهود الليله في القلعه
سواح بلدنا فاتحه ليهم دار
طلعت علينا الشمس
مش طالعه
زعلان … ما تزعل
كله يابني هزار
قاعد قبال الهم في الولعه
الثوره سلعه واسالوا العطار
العين بتضحك ولا دي دمعه
البطن حبله ولا دي استسقا
ولا العذاري ماتوا في الجامعه
ولا الفراخ تايهه عن المسقي
ليه الودان فاهمه ومش سامعه
ليه العيون شايفه ومذهوله
ليه البلد دي فتيله في الشمعه
سايحه ف ميلاد السيده الاولي
عاد الفوارس من حصار عكا
كل السبايا صحيحه أو فكه
بايته في بطنك يا امنا الغوله
انتي اللي إيدك في الوبا واحنا
كل الإيدين التانيه مشلوله ؟؟
ملعون ابوكم حتي في المحنه
صالبين مسيحنا
في الحلازونه
لما نجومكم من دهب أصلي
ماتقول يا أصلي
ليه فضيت الشونه
