بقلم : صفاء سمير
الناس اللي ربنا مبتليها ابتلاءات شديدة وتخرج من ابتلاء تقع ف التاني وكل ابتلاء اقوي من اللي قبله
انا ف الأول كنت بحزن جدا وبحس اني فعلا مابلحقش افرح من جوايا مابعترضش ولا بقول اشمعنى انا يارب والكلام ده بس غصب عني ببقى مش قادرة أتحمل الوجع
نظرتك لنفسك وانت ضعيف بتقهرك عليك ….
مواساة اللي حواليك الدائمة ليك بتخليك غصب عنك عايز تعتزلهم ولو فضلت معاهم بتفضل وانت مش موجود مابتتكلمش كتير زي الأول قافل همك على نفسك ومابتناجيش غير اللي خلقك وبس
فى وحدتك بتلاقي نفسك قربت منه قوي ، بتدرك قوي حقيقة انك مالكش غيره ، ماحدش مين مهما كان يقدر ينفعك ولا ف أيده حاجة يعملهالك
ابتلاءات كده تحمد ربنا انه اختارك وابتلاك بيها
ماينفعش فيها لا واسطة ولا فلوس تقدر تحلها ولا ناس تقدر تساعدك ولا أي حاجة غير الحكيم الكريم وبسسسسس
#فعلا مش أي حد ربنا بيديله الفرصة انه يرفعه بالشكل ده
مش اي حد ينفع يُبتلي بمرض قاسي..
مش اي حد ينفع يُبتلي بفقد اعز ما يملك في الدنيا…
مش اي حد ينفع يُبتلي بزوال نعمة كانت من اساسيات حياته..
مش اي حد ينفع يبتلي بوجع بيكسر قلبه علي نفسه او حد بيحبه..
مش اي حد ينفع يبتلي باعاقة او بمرض اولاده قدام عينيه!
مش اي حد ينفع يعيش في ابتلاءات ورا بعض و مش بتنتهي!
تأمل معايا كده الجملة دي ” الله لا يعطي المعارك إلا لأقوى جنوده ”
ربنا بيختار فئة معينة.. بيحبهم.. بيصطفيهم من بين مليارات الناس لحكمة وحده اللي يعلمها، لرفع درجاتهم..
ثقوا ان اي حد مُبتلي فهو غير كل اللي حوليه؛ اقوي و اشجع و مافيش زيه كتير..
ثقوا انهم ابطال و ممكن لو اتحطينا مكانهم نفشل في الاختبار الرباني ده..
ربنا اختار ناس بيستقبلوا قضاء الله برضا احنا نفسنا بنقف عنده و نتنح من كمية الرضا و الاحتساب و الحمد !
قال تعالي :
﴿وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ * الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ﴾
ادعولهم بظهر الغيب حتى لو ما تعرفوهمش الدعاء مستجاب قولوا لكل بطل مُبتلي و صابر و محتسب ( إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ﴾
