كتب / سماء كمال
كان ياما كان ياسادة يا كرام، ولد جميل اسمه كريم، مامته سحر وباباه عمرو.
كبر كريم ودخل كي جي ون وبدء المشوار وشيل الهم.
وبعكس اصحابه بيصحى كريم فرحان وسعيد قايم يجري على مدرسته شايل كتبه وقلمه وحاجته “باي يا ماما .. باي باي ياكريم”.
وراح كريم على مدرسته، شويه لعب مع أصحابه وشويه يجاوب على أستاذته، لغة عربية ممنوعة م الصرف!!
اسمك ايه؟؟ أنا اسمي كريم. واسم بابا؟؟ بابا عمرو.
وكتبت اسمه على كراسته وبص كريم معرفشي يفرق مين اسمه ولا مين عمرو.
والحمدلله يا حبيبي أنك لسه مبتعرفش تفك الخط!!
ورجع كريم منهك وجعان، أكل الغدا ونام شبعان، راحت مامته على كراسته وقالت اشوف جرى إيه في الفصل.
وكانت الصدمة ملهاش حد.
“يانهار ألوان! مين أمر ده”!
شافت الأسم على كراسته “كريم أمر”!! دعكت عينها وبصت تاني برده الأسم “كريم أمر”!!
ابني كريم لكن مين “أمر”؟؟
وفضلت ساكته فاقدة النطق ولسان حالها “لله الأمر”!!
وبعد ماهديت قامت ضحكت ويا أصحابها، وهات ياهزار على قفشات، اللي يقول ده أكيد فوتوشوب، واللي يقول ده فرانكوا ياستى، ولسان حالهم انسي ياعمرو ضاع الأمر!!
وكله سألها “إيه جنسية الأستاذه؟؟
وردت ” طبعاً يا بنات عربية مش هندية ولا إنجليزية” .
اومال جابت “أمر” منين ؟؟ وبعدين هو أصلا فيه راجل اسمه أمر!!
وبعد حوار ضاحك مجنون حتروح مامته على مدرسته وليلتك سوده يامدرّسته!!
وخلص الموقف؟؟
لأ مخلصشي!!
قعدت أفكر ساعة وأتنين، ايه اللي جرى وحصل في سنين، راحت فين أستاذه حنين “اكتبي صفحه بالتنوين”.
و ماله كمان أستاذ رمضان ماشي بالفلكة ليه زعلان؟؟
أصل الواد اللعبي أمين كتب الضاد من غير تنوين!!
غور من وشي يا واد يا أمين ضاعت الهيبه مع التنوين، لغة الضاد ضاعت يا ولاد، إزاي تنسوا التنوين.
وكله بيجرى شمال ويمين فكك بأه يارمضان أفندي وسيب الفلكة وإهدى يابيه، زعلان لسه على التنوين بكره حيبقى فرانكو يابيه!!
وأدي الحال يارمضان أفندي لغة الضاد تاهت ياكبير!!
كل حياتنا لطشها فرانكو وكتبوا العربي فرانكو يابيه، زعلان لسه على التنوين!!
تدخل ناشونال أو أنترناشيونال تلاقي فرانكو معاك في البيت.
تدخل ميري أو تجريبي ضاع العلم وطفح الكيل.
سات ضايعين لغات تايهين حتى العربي فرانكو يابيه!!
والمصاريف بلاعه يا ناس، اشي مدرسه ودروس للبيه، والتعليم نازل في هبوط وسياسة غامقة أخطبوط، وبعد ده كله ياريته بفايدة، بيكتبوا عمرو فرانكو يابيه!!
