جرالك إيه

كلمات الشاعرة ريم صلاح
………..
جرالِك إيه ..
يا أرض الحب يا طاهره ؟
وليه سايبه الولاد برّه
ف برد الليل على الأسفلت ؟
مابين مجروح وبين مدبوح
وأم تنوح بصوت الرعد
جرالك إيه يا طاهره الأن
وكنتي زمان ..
ولادك سنبلات خضرا
عيدان واقفه بتحضن بعض
ف ليه دلوقت ف السكّه
باشوف كل الولاد ف الضد ؟!
وليه الدم فجأه اتمد
ف كل طريق وع الرصفان
يا سلّة خير ندر خيرك
وبات إبنك هزيل وجعان
وحتى النيل على أرضك
بيمشي ف الطريق عطشان !!
بقيتي السجن والسجّان
ولمّا ولادك انتفضوا
عشان ترجع غناويكي
عشان الشمس ترجعلك
وتتدفّى كمان بيكي
لقيت الكل بات فيكي
ما بين الشئ وبين ضده
إيادي بتبني برج حمام
وتيجي أيادي وتهدُّه
وحتى المؤمنين بيكي
ف لحظه وتانيه يرتدُّوا!!
يا أم سنين ما يتعدّوا
مازال فرعون ف إيده هامان
وشكل الدم ع الأسفلت
صبح ممتد ع الرصفان
وع الصحرا
وع الغيطان
ف يبقى طبيعي أشجارك
ح تطرح ف الربيع أحزان
ويبقى الليل ف كل مكان
يشد الخطوه للعتمه
وللتوهه
وطول م الحكمه معتوهه
يموت الحق بالحسره
وحتى ما يلتقيش فيكي
ضريح يإويه ؟
جرالِك إيه ؟
.