بقلم : وفاء يوسف
قلبى فرشته جناين ورد
ورويته بكاسات السعد
وكنت دليلك
فرحة يومك
وأمل بكرة
نور أحلامك
أجمل وعد
قادلك قلبى شموعة
فى ليلك
وانت بإيدك تطفي
شموعي
قلبى بيبني
انت تهد
كنت واهبلك روحى
قلبى
وكل كياني
بحر يفيض بحنانه
عليك
جوة عيونى أنا
خبيتك
ورموشي بتداري
عليك
صنت العهد
رعيت الود
كل ده واكتر
علشان تفرح
وانت بتجرح
كل ما اقرب
ألاقيك تبعد
شمعي طفيته
واللي بنيته فى
عمري بحاله
سهري وحرقة
قلبي عليك
انت ف لحظة
نسيته،،،،
وبعت
خنت،،،
غدرت
ورميت قلبي
بقسوة،،جرحته
جيت على قلبي
وجرحي،،،
ودست
وجاي دلوقت
جاى من تاني
تحنن قلبى
جاى ببساطة
تقول نتصالح
جاى وعاوز قلبى
يسامح
جاى من تاني تدق
الباب
لأ،،،،،، ،،،،،!
وبقولها،،،.
ومليون لأ!
قلبى استكفي
وفاض أحزان
مش هيصدق
تاني كلام
ولا هيبدل
راحته،،،،،عذاب!
