كتب/ فادي محمد
كشفت نورا احمد سالم زوجة الشاب محمد داود الذي لقي حتفه علي يد وكيل نيابة منذ اسبوع عن تفاصيل الجريمة وكيف تم استدراج زوجها للاستيلاء علي سيارته عن طريق احد مواقع بيع السيارات المستعملة وكيف علمت بالحادث ووقع الصدمة عليها بعد معرفتها بما حدث يومها وتقول نورا زوجة الضحية
من ٥ اسابيع بالظبط زى دلوقتي حياتي كانت ماشية كويس جدا زى ما الكتاب بيقول متجوزة حب عمرى بقصة حب ١١ سنة ونص وبعد ما يقرب من ٥ سنين جواز ربنا كرمني بولد وبنت توأم عندهم ٣٨ يوم بالظبط وزى ما كنت بدعى الولد شبه محمد والبنت شبهى الساعة ١١وعشرة بعتت ل محمد لانه اتأخر عشان يكلمنى وهو جاى قالى انه قاعد مع الولد اللى هيشترى العربية وانه مضايق عشان أخره مستنى اخوه يجيب عربون بعتله قولتله انت خلاص هتبيعها مردش عليا الساعة ١٢ اتصلت بيه مردش اتصلت تانى حد رد عليا وقالى انه لقى التليفون بتاعه وكان عايز يعرف باص وورد الموبايل منى قولتله انى معرفهوش وتخيلت انه حرامى بس قالى انه ظابط وسألنى انتوا ساكنين فين عشان يجبلى التليفون قولتله خليه معاك وهو هيرجع ياخده اكيد او هيتصل من رقم تانى الساعة بقت ١٢.٣٠ عمالة اتصل بيكنسل وبعدين الواتس اب اتفتح قولت يبقى رجع اخد التليفون لان موبايله مقفول ببصمته بس كلمته كتير بعديها مردش وبعدين التليفون اتففل الساعة ١ لقيت رقم بيتصل بيا وبيقولى انه ظابط وان محمد فى القسم عشان فى مشكلة بسيطة وبيسألنى على العربية قولتله انه نزل بيها الصبح طب العربية مش عند البيت قولتله لأ واسوا احتمال فى بالى ان اللى كان عايز يشترى العربية سرقها منه وهو راح يبلغ قولتله طب محمد فين هو بخير اطمنى طب مش بيكلمنى ليه أصله عمل حادثة بسيطة والاسعاف اخدته هو انتوا البيت فين بالظبط عشان عايزين نجيلك وصفتله العنوان واتصلت ب اختى قولتلها الحقينى فى واحد كلمنى وبيقولى محمد عمل حادثة نزلتلى فى ثوانى وكلمت عمرو اخويا فى اقل من تلت ساعة كان جالى من شبرا لمدينة نصر وقبل ما هو يوصل كان الظابط جه ومعاه واخد تانى بيدوروا على العربية نزلتلهم الشارع مش بقولهم غير ابوس ايديكوا قولولى هو فين طب هو كويس وهما مش بيقولوا غير هو بخير انتى مؤمنة وموحدة بالله احنا عايزين نجيب حق الراجل ده وانا بقولهم انا عايزاه هو مش عايزة حقه كلامهم كان معناه ان محمد مات بس انا مكنتش مستوعبة وكنت بكدب نفسي ومتخيلة انها حادثة كبيرة وهتعدى على خير عمرو اخويا وصل وقف معاهم وشه اتغير ١٨٠ درجة جه مسكنى وقالى ” نورا تقريبا كده محمد خلاص ” مكنتش بقول اى حاجة غير يا عمرو ابوس ايدك ودينى ليه ويا ولاء ابوس ايدك صحينى من الكابووس ده روحنا القسم بينادوا على زوجة المتوفى ! اللى هى انا وكل ده انا مش مستوعبة ان دى انا وبقول لنفسي محمد عايش وكل ده هيخلص وهاروح البيت الاقيه هناك تحقيق طويل عريض معايا عن اليوم من اوله لاخره لحد دلوقتي انا مفهمتش جوزى مات ازاى ولا ايه اللي حصل وبعد كده واحدة واحدة ابتدت الامور تبان محمد قبل ما يموت ب حوالي اسبوعين عرض عربيته للبيع لانه كان عايز يغير لونها واى حد يعرف محمد هيعرف هو بيحب العربيات اد ايه وكل شوية يغير العربية كلمه واحد وقاله انه هياخد العربية بالسعر اللي هو عارضها بيه وجه شاف العربية وقابل محمد اكتر من مرة الشخص ده كان وكيل نيابة وعنده ٢٧ سنة وبعد التحقيق معاه اكتر من مرة وكل مرة ب كلام شكل كان الكلام النهائي انه كان عايز يمضيه على عقد بيع العربية ومحمد رفض الكلام ده فضربه بالنار !!
اخر كلام كان بيني وبين محمد كان الساعة ١١.١١ دقيقة بالظبط محمد تقريبا مات مابين ١١.١٥ و ١١.٢٠ يعنى بعد مانا كلمته بحوالي ٥ او ١٠ دقايق الشخص ده نصب على ٣ قبل محمد واخد عربياتهم والله اعلم ليه محدش منهم بلغ عنه او هو كان بيطلع منها ازاى لحد دلوقتي هو محبوس وبيتحقق معاه وبيتحقق فى القضية ولسة مستنين يحولوها للمحكمة عشان نقدر نشوف التحقيقات او نحضر الجلسات بالنسبة ليا احتسب محمد عند الله شهيد لانه من مات دون ماله وعرضه فهو شهيد وهو كان بيدافع عن ماله اما الشخص ده فانا عندى يقين تام بالله انه مش هيضيع حق محمد ولا دنيا ولا اخره وربنا هيخلص حقه وحق بلال وجويرية منه
اللهم إنا لا نزكيه عليك ولكنا نحسب انه أمن وعمل صالحا فأجعل له جزاء الضعف بما عمل وأجعله فى الغرفات من الامنين
نسألك الدعاء له بالرحمة والمغفرة وان ربنا يتقبله من الشهداء
