1 / بتاريخ الاثنين ٢٢ فبراير ٢٠١٦ من ٣ أسابيع محافظ البنك المركزي طارق عامر قال في فيديو مصور : «السيسي يتركنا نبدع.. ولا نفكر في تخفيض قيمة الجنيه» نركز قال من ٣ اسابيع لا نفكر في تخفيض قيمة الجنية 2 / بتاريخ ٨ مارس قرر البنك المركزي برئاسة طارق عامر انه يلغي الحد الاقصى للايداعات في البنوك يعني بدل ما كنت تقدر تودع مبلغ محدد يوميا تقدر تودع بدون حد اقصى يعني تشتري دولارات او تدبرها من البنك براحتك و تحط في حسابك البنكي يا معلم 3 / بتاريخ الخميس ١٠ مارس ٢٠١٦ بعد يومين من رفع الحد الاقصى للايداعات بالنقد الأجنبي أعلن البنك المركزى المصرى ضخ 500 مليون دولار فى عطاء استثنائى بديلًا عن العطاء الدولارى الدورى الذى كان مقررًا اليوم بنحو 40 مليون دولار للبنوك العاملة فى السوق المحلية بسعر 7.8301 جنيه للدولار. ☆ ☆☆ يعني البنك المركزي باع ٥٠٠ مليون دولار “نص مليار دولار” للبنوك بسعر 7.83 جنية … باع امتى بتاريخ ١٠ مارس و البنوك باعت جزء من الفلوس دي لمستثمرين و مستوردين و (مؤسسات) و الباقي احتفظت بيه منهم بنوك حكومية و بنوك أجنبية يعني اللي اشترى من اسبوع سواء البنوك او اللي اشترى من البنوك اشترى بسعر 7.83 جنية 4 / بتاريخ ١٤ مارس يعني بعد ٤ أيام فقط من بيع طارق عامر لنص مليار دولار بسعر 7.83 رفع طارق عامر سعر الدولار ليصبح 8.85 قرش يعني بزيادة سعر 1.12 قرش يعني اللي اشتروا النص مليار دولار من ٤ ايام فقط كسبوا رسمي 1.12 على كل دولار يعني كسبوا في ٤ ايام فقط ٥٦٠ مليون جنية بسبب قرار طارق عامر في خبطة واحدة .. ايوة 560 مليون جنية مكسب (رسمي) في 4 ايام
السؤال الاول : لما النية مبيته لرفع سعر الدولار ليصل قيمته 8.85 جنية بشكل رسمي ليه طارق عامر باع 500 مليون دولار من ايام بس بسعر 7.83
السؤال التاني: مين هيتحاسب على اهدار فرق السعر بين 7.83 اللي اتباع به الدولار من ٤ ايام و سعر امبارح 8.85 ؟ كدة في ٤ ايام طارق عامر مخسر الدولة 560 مليون جنية لانه بايع الدولار بالرخيص بسعر مدعوم من ٤ ايام بس نص مليار دولار مخسر خزينة الدولة على كل دولار 1.12 جنية شوف انت 560 مليون جنية فرق سعر دول فيهم كام تصبيحة على مصر من اللي قال عليهم السيسي.
السؤال التالت : هل تم توجيه الدولارات دي من البنوك لصالح حسابات عملاء معينين سواء افراد او مؤسسات او شركات بعد قرار رفع الحد الاقصى للايداعات اليومية؟؟؟؟
السؤال الرابع: لو انت عايز تخفض قيمة العملة بفرض حس النية (اللي مش موجود) ازاي فجأة تخفضه 14% ليه محصلش دة بشكل تدريجي كل يوم قرش صاغ او اتنين؟؟؟؟
*** المفاجئة ان قرار بيع ال 500 مليار دولار حصل بعد ما البنك المركزي رفع الحد الاقصى للايداعات اليومية داخل الحسابات بيومين يعني من الاخر القرار متفصل عشان النص مليار دولار المدعومة تتباع و تدخل حسابات بدون حد اقصى و بعد 4 ايام اللي اشترى كسب 1.12 لكل دولار (رسمي)
نفتح الحد الاقصى للايداعات – نبيع نص مليار دولار بالرخيص – اشتروا و حطوهم في الحسابات و بعد ٤ ايام هكسبكم ٥٦٠ مليون جنية ( اكتر من نص مليار مكسب في ٤ ايام) عملية على مية بيضة الدولة خسرتهم من خزينتها لصالح ناس معينين … المهم ان طارق عامر عشان يغلوش على النص مليار دولار اللي باعهم من كام يوم و اتعمل بيهم السبوبة بالسعر القديم راح طرح بالسعر الجديد 200 مليون امبارح و 200 مليون النهاردة قال يعني بيغرق السوق دولارات عشان يقضي على السوق السودة اللي هي في الأساس مستحيل تخسر البلد في ٤ أيام ٥٦٠ مليون جنية بس الباشا عملها و خسر خزينة الدولة فرق السعر ارجع معايا لاول سطر مكتوب اللي قال فيه طارق عامر محافظ البنك المركزي بيقول «السيسي يتركنا نبدع»
في اوربا و الدول المتقدمة دة لو حصل بيسموه سرقة لو ثبت استفادة افراد او شركات او مؤسسات معينين من القرارات و اللي اخد القرارات دي بيتحاكم و في اقل توصيف جنائي اسمها جريمة اهدار للمال العام … هنا في مصر بيسموه ابداع و كمان برعاية الرئيس
