بلاغ مواطن ضد مدرسة دولية بالشيخ زايد يرسله الى من يهمه الأمر

وقد جاءت تفاصيل ما تعرض له كما جاءت برسالته كالتالى

بلاغ إلي من يهمه الأمر
قررت اني انقل بناتي من مدرسة دولية في الشيخ زايد احتفظ باسمها للسادة المسئولين في هذه الدولة لو كانوا مهتمين يعرفوا اسمها وكنت دفعت مبلغ ١٠٠٠٠ (عشرة آلاف) جنيه تحت حساب السنة الجديدة لكل بنت

ولما ابتديت امشي في الإجراءات المدرسة سلمتني طلبات التحويل وقرروا انهم يخصموا مبلغ ٦٢٨٠ جنيه من كل بنت بحجة انها ١٠٪‏ من مصاريف المدرسة للسنة الدراسية الجديدة اللي احنا مش هنكون فيها في المدرسة!!!!!

وبعد مواعيد كتير رحت استلم الفلوس الباقية اللي هي ٣٧٢٠ جنيه لكل بنت واسلم المدرسة طلبات التحويل بعد اعتمادها من الإدارة التعليمية وأخذ ملفات البنات
بلغوني اني لازم امضي علي الإقرار ده قبل ما اخد اي حاجة؟!!!!
المدرسة قررت انها تمضيني بالغصب علي إقرار بالإذعان علشان اخلص مصلحتي وأجبرتني علي التنازل عن اي حق ارجع بيه عليهم بعد ما اكلوا عليا ظلماً وعدواناً وسحتاً ١٢٥٦٠ جنيه
ياريت نشير البوست ده يمكن يوصل لمعالي وزير التربية والتعليم علشان يشوف بعينه المدارس الدولية مالهاش كبير ولا رقيب في الدولة
او يمكن يوصل لمعالي النائب العام ويشوف بنفسه ازاي المدارس الدولية بتسرق المواطنين وتبتزهم
او يمكن يوصل لفخامة الرئيس عبد الفتاح السيسي علشان يشوف بنفسه أولياء الأمور بيتلعب بيهم ازاي علشان يحاولوا يعلموا ولادهم كويس
حسبنا الله ونعمة الوكيل