دي لو نقابة بتبيع ترمس المفروض الجهات الأمنية تتعامل معاها بحرص شوية العملية يعني مش سايبة ، طيب ده هيخلي كل الصحفيين عندهم سخط من هذه الفعلة ، وطبعاً أكيد مش هيسكتوا والموضوع مش هيمر سداً ، هيقفوا برة النقابة وهيملوا الساحة الخارجية امام النقابة وساعتين تلاتة وأكن مفيش حاجة حصلت كام برشامة ” مسكنات يعني ” ، علي كام تدليكة من القائمين علي الأمر ، ويمكن الموضوع يتجاوز الحدود ويدخلوا علي مناطق حساسة ولا حاجة ، أهو كله في سبيل الحفاظ علي الإستقرار .
يا جماعة الصحافة فكوها شوية بلاش تعقدوها كدة ، فرفشوا ، ايه يعني تم إقتحام النقابة وخدوا اتنين ، متبقوش حمبلية قوي كدة يعني ، وبعدين هو مين إللي إقتحم النقابة ، دي شرطة مصر ، مش شرطة كوالالمبور ، ولا شرطة روحية أفشخانة ، دا حتي دخلوا جابوا الولدين وسلكوهم أكنهم بيسلكوا شوية دبارة مكعبرين ، ولا أهانوهم ولا حاجة والأولاد صاغ سليم ، عملية نضيفة يعني ، أمال لو تعاملوا معاكوا بمنطق الخمسينات والستينات والسبعينات ، كنتوا عملتوا إية ، دا حتي كتر خيرهم .
طيب إيه بقي حكاية الأخين رحباني اللي تم إقتحام الشرطة عشانهم ، أكيد طبعاً إستفذوا الشرطة ، بقي ده ينفع يا رجالة ،ده في حالة حرب مع أعداء الوطن وأعداء الإنسانية ، وأعداء الكتاكيت والنمل والفول السوداني ، لا يا جماعة ميصحش الشرطة إللي بتحمينا ، إحنا بنام ونشخر وناكل رز مع الملايكة ، وهما سهرانين مبينموش ويطبقوا باليومين والتلاتة مزنهرين وإية زنهرة رباني من غير وسائل مساعدة .
بصراحة نقابة الصحفيين المفروض تقدم إعتذار للسيد وزير الداخلية ، لو كان حد شتمه من السادة الصحفيين ، عشان ده مينفعش يا جماعة ، دا هو الفنان إللي بيحافظلنا علي هدوء وسكينة وإطمئنان البلد ، بقي بدل متشكروه تدينوه ، وتخلوا شكلوا بايخ ، ولا واحد من الصحفيين الكبار ، بيقول إيه الرياسة متعرفش حاجة عن موضوع الإقتحام والرياسة بتدين هذه الفعلة ، إيه يا عم الكلام الكبير دة ، ميصحش كدة إنت كدة بتلبس الرجل المحترم ابن المحترمين وزير الداخلية في الحيط ومع مين مع الريس ، وإية الرياسة متعرفش ، طيب يا ابني ازكان الريس رجل بتاع مخابرات يعني من الأخر ممكن يعرف الست مامة لبسة الأندر وير بتاعها لونه إيه والمقاس وصناعة محلية ولا مستورد وفيه كام ياردة خيط إستخدموا في الخياطة ، ووزنه كمان ، إيه يا عم رزق هو فيه حد عملك متحدث رسمي للرياسة انتي كدة بتقلل من شأنها ، بصراحة يا عم الخفيف الكلام ولا التصريحات اللي بتقولها دي بقت قديمة وماسخة عمله زي طعم البطيخة اللي بتتغذي علي مية المجاري ، مينفعش كدة .
