بقلم / خالد الترامسي
الله عليك يا بكري ، الله ينصر دين أبوك ، إيه يا عم المواقف الجامدة دي ، فينك من زمان ، حمد لله علي سلامتك ، أخيراً الحمد لله بقي عندنا ناس بتحس وبتدور علي حقوقنا ومصالحنا وخاصة الناس المتكحرتة برة ، بس يا عم بكري الأخ شريف حبيب ميخائيل زي مهو مصري هو بريطاني الجنسية برضوا يعني من الأخر مش متكحرت ، الجنسية الإنجليزية يا سيدي وما إدراك ما الجنسية الإنجليزية .
طيب يا معالي الباشا لو السيد / ميخائيل قُتِلَ في كوالالمبور كنت ثورت وهجت ” من الهياج يعني ” هاج يهوج هوجاً ، كنت هتبقي بنفس الحماسة ؟ .
طيب سؤال تاني لو كان (محمد) إبن أخوك(علي )هو إللي إتقتل في بلاد الضباب ” بلاد الإنجليز ” يا تري يا هل تري كنت هتبقي علي نفس الوتيرة ، حلوة الوتيرة دي ، أوعي تفكرها مرادفة للوتريات ” العود والكامنجا وألة القانون ” وتقعد تمزك وتدندن ، لا وتيرة يعني علي نفس المنوال ، هو فيه إيه إحنا بنصعب الكلمة بكلمة أصعب ، أقصد يعني علي نفس الدرجة من الحماس ، أوعي ساعتها تكون خارج نطاق الخدمة ، وتصهين عن الموضوع حلوة تصهين دي ما هما أساتذتكم والله أعلي وأعلم إيه تاني ، ساعتها هصلت عليك الحاجة صباح ، دي بقي كوافيرة من الدويقة هتعرفك مقامك يا كبير .
ريجيني وبدنجاني وصاصة ومصاصاش ، وما شاء الله الدنيا بقت تقوم وتقعد والدول تتنطط ، ورؤساء تتناول الموضوع إيه يا جماعة فيه ايه ، كلنا أموات ، ومتحطوش الموضوع في إطار واحد قصد واحد ، إشمعني النغمة دي دلوقتي ، مصريين ماتوا بالمئات برة ، ومعتقلين في بعض سجون بعض الدول ومازالوا كنتوا فين ، ولا فيه حد بيحركوا بابيتس .
إيطاليا مبقتش تيجي شرم الشيخ والغردقة وروسيا سبقتها ، إيه عاوزين إنجلترا روخره تدخل السباق ، طيب إنتوا بتحبوا البلد ، أنا مش عارف إنتوا وقفين جنب الريس ” السيسي ” إزاي ولا هو كلام وخلاص ومن ناحية تانية بتغرقوه وتزنبقوه ، مينفعش الكلام ده يا بيكي إنت وغيرك من السادة الإعلاميين .
طيب هقولكوا علي حاجة ، إنتوا مش عارفين إن السياحة إتضربت وخدت علي قفاها !!! طيب أنتوا عارفين إن أصحاب الفنادق في شرم والغردقة ، قفلوها بالضبة والمفتاح ، طيب أنتوا عارفين إن عمال وموظفي هذه الفنادق بيلعبوا صَلَحْ دلوقتي ، وحريمهم بيلعبوا صلح بس مش بالضرب علي كفوفهم لا بالضرب علي قفاهم ، أنتوا عارفين لو تروحوا تلعبوا معاهم صلح يمكن يبقي أفيد للبلد من كتاباتكم وظهوركم الإعلامي إللي هيودي البلد في ٦٠ دهيه ، الناس مبقتش لقية تاكل أرحموووووووووووو مصر .
