بقلم / خالد الترامسي
بالأمس إنتهي مجلسنا الموقر من تشكيل لجانه النوعية زغروتة كبيرة يا أم الهنا ، ويا بت يا سعدية قومي هزي وسطك اللي مش علي بعضه ده ، مجلسنا خلاص هَيتْفَعِل وهيشتغل ويسن لنا السكاكين ، قصدي القوانين ، وهيراقب الحكومة ويعرفها قيمتها وإن البلد فيها رجالة بتقف وقفة رجالة ، من ساعة إنتخاب المجلس لحد دلوقتي وهما بيواصلوا الليل بالنهار ، عشان راحتنا وبث السعادة في نفوسنا ، والله الناس دي خسارة فينا إحنا ناس وش فقر ، قاعدين كل شوية نقطع في فروتهم وأكنهم شغالين عبيد عند اللي خلفونا ، بقي يصح كدة إيه يعني الكام صوت اللي نجحوهم ، مهما جهم بفلوسهم إنتوا معتقدين أصواتكوا دي ليها لازمة ، دا الناس دي تشتريكوا وممكن تبيعكوا بالقطعة ، يعني ممكن يبيعوا كلاويكوا ، فشتكم ، عيونكم الوحشة ، ودانكم ، بقكوا إللي عاوز يتقطع من لغاليغوا ، يعني من الأخر هتتفككوا ، زي العربيات إللي كانت بتتقلب أيام الفوضي والنكد اللي عملتوه بأدمغتكوا اللي عاوزة تتحشي دناميت وتتفجر ، زي الثورات إللي فجرتوها ويا ريتنا اتقدمنا قيد أنملة ، عموما ربنا يسامحكوا.
لكن طبعاً بعد اللجان أظن مبقاش في حجة عند البرلمان إنه يبتدي يفَعِلْ دوره ولازم من أولها يدبح القطة للحكومة ، إيه ؟ الحكومة هي إللي دبحت القطط ، وكمان قطط مش قطة واحدة ياه ، أتريهم مأنتميم مع بعض والدنيا ماشية معاهم زي العسل وقسموا اللجان علي بعض ولا حد زعل من التاني ولا حاجة أهي ماشية معاكوا زي الحلاوة .
طيب ماشي يا جماعة مش هنزعل لما تمشوها حبي ” ودي يعني ” وبالفرنسية amicalement عادي يعني يعني هي كانت بلد أبونا ، بس برضوا أهم حاجة برضوا لازم تحافظواعلي مشاعرنا شوية ، هو صحيح إحنا غلابة وعلي قد حالنا ، بس راعوا مشاعرنا ، وراعوا إن فيه شوية ناس برضوا عندهم شوية دم وبيحسوا ، وفيه برضوا شوية كدة مدقرمين وعاملينلي فيها جهابزة زمانهم ، فلازم تخدوا بالكوا منهم شوية ، أصل فيه معدل لمستشفيات الأمراض العقلية ، وإنتوا ما شاء الله لا بتصرفوا علي صحة ولا يحزنون ، ولا عندكوا فلوس تزودوا مستشفيات الأمراض النفسية ولا حاجة ، وفنفس الوقت المصحات الخاصة غالية ، فرويدا رويداً علي الناس الغلابة دي ليتخبطوا في دمغهم ولا حاجة ويصدروا ليكوا بعد كدة العبيطة وإنتوا إللي هتحتاسوا .
أنا بقول كدة ليه يا حبيبي يا طعمين وبوجه كلامي للمجلس الموأر علي رأي عم ” عبد الفتاح القصري ” أنتوا طبعاً وزعتوا الكراسي بتاعة السادة رؤوساء اللجان النوعية شوية لدعم أُمنا مصر وشوية للوفد وحبة للمصريين الأحرار علي مقعد للحزب الفلاني علي أخر للحزب العلاني ، ماشي مفيش مشكلة لكن مينفعش حاجتين لما يجي رئيس لجنة وبعد ساعتين من تنصيبه يتسأل سؤال أخبار القوانين يقول يا باشا القوانين زي الفل والحكومة مقدمة حبة قوانين زي الفل ناقص يقول زي الباشا واتعرضت علي مجلس الدولة واتوافق عليها ، هو المفروض انتي أو أنتوا يا رؤساء اللجان قاعدين تمرروا قوانين ولا انتوا لزمتكوا اية ، طيب الحاجة التانية هو مش المفروض يتم اختياركوا بناء علي برنامج انتوا مقدمينه علي باقي الأعضاء يبين مدي قدرتكم بالإلمام بالجوانب الفنية والعلمية بنشاط اللجنة المزمع رأستها ، ولا أنتوا بيتم إختياركوا عشوائي ؟ إيه ؟ عشوائي، ماشي طيب حد ينزلي الكوبلية بتاع الحاجة صباح ، سلمولي علي نوارة العين سلمولي .
