بقلم : خالد الترامسي
١٢ ألف شرطي ثبت فسادهم بجهاز الشرطة !!!
وحسبما صرح نائب رئيس جهاز أمن الدولة اللواء عبد الحميد خيرت ومدير المركز المصري للدراسات الأمنية في برنامج للإعلامي إللي مصر كلها بتحبه ههههههههههه الحاج الشيخ أحمد موسي في برنامجه علي قناة ” صدي البلد ” أن هناك نحو ١٢ ألف شرطي يسهلون الأعمال المنافية للأداب ” السيكو سيكو يعني ” والإتجار بمخاميخو ، طبعا أكيد بالمرة سرقة السيارات والمتوسيكلات والإتفاق علي إعادتها مقابل اللرجونات ” العمولة ، الحلاوة ، البقلاوة ، ملوخية ، بامية ” أي حاجة المهم يسلكوا حالهم ، طبعا كلام نائب مدير الأمن الوطني سابقا كلام صادم وبصراحة ميتقلش حتي لو كان الكلام ده موجود بالفعل ، لأن ده من الأمور التي تتعلق بالأمن القومي للبلاد ، يعني المفترض لو فيه ١٢ ألف فاسدين بجهاز الشرطة يقول في ٥٠٠ ولا ٣٠٠ شرطي فاسدين مش ١٢ ألف إيه يا عم دا أنت لو قاعد في غُرْزَة مش في قناة وقناة كبيرة ومحتتتتتتتترمة ومع إعلامي كبيييييير مصر كلها بتسمع كلامه وهَيسْتْ عمرك مهتقول الكلام ده ، ١٢ ألف .
طيب هنمشي مع كلام الرجل ده وأكيد كلامه صح ، اللي هو صادم لي طبعا ، هنشيل طبعا السادة المجندين ، هيتفضل عندنا السادة الأمناء والضباط وهما عددهم علي بعض لا يتجاوز ال ١٧٠ ألف يعني أنا بتكلم في ٧ % من تعداد الفاعلين العاملين بجهاز الشرطة فاسدين ، وتخيلوا إيه كمان إن الرجل إللي هو وكيل الجهاز سابقاً بيقول ال ١٢ ألف دُول تم ضبطهم وفقاً لتحريات دقيقة ، طيب أُمال التحريات إللي مش دقيقة ممكن تطلع لنا كام ألف تاني يا سيادة معالي اللواء المبجل المحترم ، دا إنتي يا أخي شككتني أنا في كفي كام صباع ، ومبقتش عارف هي بقت صوابع كفتة ولا صوابع حشيش ، بذمتك ده كلام ، الناس المحترمة إللي زي الفل إللي عمرهم ما قتلوا سواق عشان إختلفوا معاه في دفع الأجرة ، ولا قتلوا واد غلبان بيبيع شوية شاي في نصبة بدل ميروح يرمي بلاه علي الناس يسرقتهم ولا يثبتهم زي ” ميمس “، ولا عمرهم ما خدوا بنات في شقق وماتوا وجسسهم ريحتها فاحت في الشقة وهما في حالة سكر وتحشيش وعربدة ، دي ناس نظيفة وزي الفل يا سيادة اللواء مينفعش الكلام ده ، أنتي شكلك مِأَنْتِم مع الإخوان ولا حاجة .
طيب يا كبير إديني عقلك ينفع الكلام ده ، طيب أأمِن علي حياتي إزاي بعد كدة ، أطفش يعني وأروح الصومال ، لا يا عم خلينا هنا في مصر بكرامتنا بلا بوكو حرام ولا بدنجان ، هي مش ناقصة ، أهو حتي الشرطة علي قد أسنانا ، إيه يعني يطلع واحد فاسد من الحلوين إللي سيادة اللواء ذكرهم ، يلفق قضية ، ولا يديني علي قفايا ولا يعاملني بقلة ذوق عادي ولا ” حقوق إنسان ” ولا يحزنون ، وعموما أهو فيه رب ينفخهم يوم القيامة ويخليهم عبرة لمن لا يعتبر ، وأياً ما كان الأمر أهما برضوا بينفعوا بدل ميحصل إنفلات أمني ولا حاجة ، أقله هما هيقلبونا ويخدوا اللي في جيبنا أما المنفلتين هيقلبونا ويموتونا كمان ، يبقي نتقلب أحسن منتقلب ونموت .
