الوجه الاخر .الجنرال ..الحكايه يا ريس مش حكاية قصور رئاسيه
الجنرال يكتب
اللواء هانى غنيم
الحكايه يا ريس مش حكاية قصور رئاسيه و الهبل ده ، مش فارقه معانا .. ، احنا أخرنا نتفرج عليها .. القصور دي مظهر للبلد مشرف واحنا عارفين ، و بتاعتنا في الاخر .. مش ده اللي شاغل بالنا ولا ده اللي يهمنا ..
احنا بس عايزين نعرف هنعيش عيشه حلوه امتي !!!
مش عايزين نعيش ف قصور لأ ..
بس عايزين نعيش ف بيوت أدميه .. بيوت عاديه ..
انت عارف يا ريس الواحد من شبابنا دلوقتي بيعمل ايه علشان يجيب شقه يتجوز فيها .. طيب عارف أسعار الشقق وصلت كام ؟! ..
طيب عارف المرتبات أد ايه !!!!..
طيب حد قالك مصاريف الأكل والشرب واللبس ف مصر بقيوا أد ايه ؟..
ده احنا حتي لما بنتعب مبنلاقيش الادويه ، والمستشفيات مبتفتحش ابوابها غير للي معاه فلوس او واسطه ..
.. وعلي فكره التامين الصحي صحيح حضرتك بازل مجهود غير طبيعي فيه بس برضه للاسف لوحدك .. طيب خدت بالك م المدارس وشفت التعليم وصل لايه ؟! وبرضه منظومه الاصلاح في التعليم اللي بتحصل دلوقتي كل شعبك مش فاهمها لانه انت برضه شغال لوحدك .. طيب مشيت ف الشوارع وجربت الزحمه والعشوائيه والبلطجه ؟! وده ملوش علاقه ولا بننكر الشقق والمدن الجديده اللي حضرتك بتعملها وحصلت فعلا ..
مش هكلمك عن الاعلام لاني سمعتك وانت بتنادي عليهم وسمعتك وانت بتطلب منهم وسمعتك وانت بتفهمهم مخاطر اللي بيعملوه فينا وفي البلد كلها يا ريس الاعلاميين في بلدنا بيدمرونا فعلا بالجهل او المنظره او البلطجه ومش سايبين مجال لاي حد يشتغل غيرهم …
وللاسف هما طريقين بس الاعلاميين في بلدنا ماشيين فيهم يا اما يطبلوا بالباطل وده بينقص من محبتنا ليك … او الطريق التاني وهوا الهجوم عليك برضه بالباطل وده بيزود حسابتهم في البنوك من اعداء بلدنا ..
ياريس … احنا محدش بيفهمنا ايه اللي بيحصل والتطور والاجراءات والبنيه التحتيه والعلاقات الخارجيه و مكانه مصر بين دول العالم و و و كل الحاجات دي محدش ( محترم مهنيا وذو مصداقيه )بيكلمنا عنها ولا بيفهمنا احنا بقينا فين ،،،
الناس يا ربس ف كرب وشكوتها لله ، والشوارع بتغلي من الأسعار وقلة الحيله ..
لو قالولك ان كل حاجه بقيت زي الفل يبقي بيكدبوا عليك يا ريس .. لو قالولك ان شباب مصر هما اللي انت بتشوفهم ف كل مؤتمر يبقي اللي معاك كدابين يا ريس ، مش هما دول شباب مصر .. ولا هوا ده شعب مصر .. انزل الشارع واتفرج ياريس ..
هتلاقيهم مطحونين وتعبانين وشقيانين ومتعشمين ف أي نقطة أمل .. عايزين بس يعيشوا زيهم زي غيرهم .. وميجيش عليهم يوم يمدوا ايديهم لحد ..
الحكايه مش حكاية غلاء و قله حيله وتعب في الشغل والحياه يا ريس ،
الحكايه حكاية شعب لم يجد من يحنو عليه
وانا اعلم انك باذن الله قادر علي حمل الامانه تماما
.. امضاء ،،
مواطن مصري بيحب مصر وبيحبك ويحترمك
– تحيا مصر بينا ياريس سوا كلنا ايد واحده
