زى دلوقتى و من شهر بالظبط
و قبل الفجر
كنت فى شارع العريش ناحية فيصل
شوفت واحدة محجبة
عندها حوالى ٤٠ سنة
كانت فى ايديها شنطة كبيرة و بتعيط
سألتها فى حاجة ضاعت منك ؟
طيب حد عاكسك . حد اعتدى عليكى ؟
و هى تعيط
قولتلها طيب تعالى نروح
قسم الهرم لو فيه حاجة
و الدموع نازلة من عيونها زى النافورة
قالتلى ممكن طلب
ممكن ١٠٠ جنيه و تودينى رمسيس
أبات فى اى فندق هناك ..
طبعا انا ليا نظرة فى اللى بيكلمنى
لا يمكن دى تكون بتشحت .. مستحيل
قولتلها لو عالفلوس سهلة
لكن ١٠٠ جنيه هتباتى بيها يوم
طب و بعد كده ؟
لاقيتها رجعت تعيط تانى
هديتها و جبتلها عصير
قالتلى اخويا رمانى فى الشارع
عشان يتجوز
قولتلها و فين اهلك ؟
قالتلى هايعملوا ايه . بيخافوا منه
قولتلها طيب بصى و ماتفهمنيش غلط
انا قاعد لوحدى . خدى مفتاح الشقة
و هديلك ٥٠٠ جنيه اصرفى منهم
و ادينى رقم اخوكى و عنوانه
و نشوف حل للموضوع ده
و بالفعل اديتها مفتاح الشقة
و انا قعدت مع صديقى
المنتج السورى محمد امين
قعدت معاه شهر بالظبط
فى شقته بالمريوطية
اتصلت ب اخوها ..
قاللى انت مالك و مالكش فيه
مكانش قدامى حل
غير ايهاب صاحبى مقدم فى أمن الدولة
الواد اخوها اللى العيلة كلها بتخاف منه
و كان بيعاير أخته انها ماتجوزتش !!
المهم الواد ده .. بقول واد لانه مش راااجل
إتشد شدة حلوة و عرف ان الله حق .
بس انا خوفت على اميرة منه
المهم .. اميرة رجعت لاخوها
و كلمتنى من شوية عالواتس
قالتلى لولاك كان ممكن انحرف
و دعيتلى كمان
قالتلى ربنا ينجحك و يسهلك امورك ..
و تقولش يا اخى كان باب السما مفتوح
اقسم بالله كان فى حاجات كتير متصعبة
بقت بتتسهل قدامى بشكل كبير ..
اولا أنا مش بتباهى بالبوست و اللى عملته
انا معملتش خير و لا ثواب
ده الصح و دى الأصول و ده الواجب
ثانيا اميرة مالهاش صفحة عالفيس
و لو كان ليها مكنتش كتبت حرف واحد
احتراما لمشاعرها .
ثالثا عاوز اقول ان اللى فيها لله مابتغرقش
و مستحيل تقول يارب و يتخلى عنك
ياريت بقى أى راجل ياخد باله من عرضه
من امه و أخته و مراته و بنته
احنا فى زمن صعب أوى يارب استرها على بناتنا
