الشاعرة/نادية البسيونى
القصيدة جاية جاية
هى هاتروح منى فين
ده اللى عاش فى القلب ثانية
عمرى ماانسى نور عنيه
شفت خير من بعد ليل
شفت قلب الكون كبير
جاى شايل قلبى شيل
والتقيتك نبض قلبى
فوق جبال الروح تطير
وجناحاتك ضل آمن
بالمحبة والحنين
والتقيتك نن عينى
بين سحاب ابيض حرير
من حنانه وعطف قلبه
خلى جفن الشوق كحيل
والتقيتك
نهر عاشق
للسواقى وضحكة حلوة وبيت بطين
وبحروف الورد كاتب
يا حبيبتى
ميلى مع أحلامى ميل
فجأة عدت اندهاشة
زغللت عينى اليمين
والشمال قالت يا عينى
فرقت بيننا السنين
قلت حاشا النور يفرق
حد عمره شاف قمرنا
فى تمامه كان حزين
حد شاف النجمة مرة
ترتجف تحت النخيل
يا ليالى المحرومين
المحبة مش قصيدة
فى طابور العاشقين
مش سحابة
تسقى مرة ومرة تبخل ع السبيل
لسة بحر الشوق طويل
يا حيطان الليل قوليلى
إنت صاحية ولا نايمة ولا تايهة ولا إيه
يا كراسى ساكتة ليه
تحت رجليكى خطاوى ماسكة فيكى
وابتزالك للحكاوى ضن بيكى
ياه عليكى
لما تعميكى عنيكى
والقصيدة بين إيديكى
