كتب / عصام الخطيب
فى تصريح للدكتور خالد رفعت رئيس مركز طيبة للأبحاث والدراسات السياسية لجريدة العالم الحر عن رؤيته الخاصه عن ثورة يناير قائلا :-
لن يعترف ابدا اولاد مجيدة ان 25 يناير كانت مؤامرة مهما قدمت لهم من مستندات وادلة وكيف يعترفون انهم يعيشون فى الوهم او خدعوا …. وكل ما تكلمهم حيقاوحوا بشوية كلام مكرر ومحفوظ …. هنا الرد عليه .. ولكنهم برضه لن يقتنعوا.
= الادعاء :ثورة يناير موجودة فى الدستور
= الحقيقة : ده سرد توافقى وضع فى ظروف لم الشمل وحيتم تغييره لما الشعب كله يفوق زيه بالضبط زى لما كان دستور 1971 بيتكلم عن ثورة التصحيح (15 مايو) وعشان هى مكانتش ثورة اتشالت بعد كده … مجيدة مذكورة فى ديباجة الدستور ولم توضع فى اى مادة نهائيا
= الادعاء : السيسى بيقول انها ثورة
= الحقيقة : طب ما السيسى برضه ادى التحية العسكرية كتير لمرسي ! هل معنى كده ان مرسي رئيسنا ؟ السيسى رجل مخابرات عاوز البلد تقوم وتضمد جراحها … وشوية بشوية نكشف للناس الحقائق لغاية ما هما لوحدهم يطلبوا منه ميقولش كده.
= الادعاء : الجيش وقف مع ثورة يناير
= الحقيقة : كانت خطة اجهزة الدولة هى “تظاهر بالسقوط حتى لا تسقط وانهض عندما يستدير المارد لتقتله” …. ونجحت الخطة … مكناش نقدر نحارب الغرب زى ليبيا او سوريا … او نستسلم لهم زى تونس واليمن …
= الادعاء : حيكلمك شوية عن الظلم والفساد ايام مبارك
الحقيقة : اه طبعا كان فى ظلم … وده اللى استغله الامريكان والاخوان عشان يشحنوا بعض الشباب ويستغلوا غضب الناس من الاوضاع … بس الفساد والظلم بقاله سنين اشمعنى كل الثورات العربية قامت فى شهر واحد ؟ وهل ظلم مبارك وفساده كان فى ليبيا او سورية او اليمن او تونس ….
= الادعاء : حيقولك ان بسبب مبارك مصر فيها اعلى نسبة فيروس سي وسرطان فى العالم
= الحقيقة : سبب انتشار فيروس سي هو حملات مقاومة البلهارسيا فى الستينات لما كانوا بيستعملوا نفس الحقن الزجاجية فى حقن كل اهالى القرية وحسب إحصائيات منظمة الصحة العالمية مصر رقم 41 فى العالم فى نسب الاصابة بالسرطان.
= الادعاء : الفقر والمرض والجهل ازداد فى عصر مبارك
الحقيقة : متوسط دخل الفرد فى سنة 81 كان 670 جنيها سنويا اصبح 2460 فى 2010 … وارتفع متوسط الاعمار من 56 سنة للرجال و 58 للسيدات سنة 81 الى 67 سنة للرجال و73 للسيدات سنة 2010. تم القضاء على شلل الاطفال والبلهارسيا فى 2008 (للاسف تم رصد 5 حالات شلل اطفال فى 2013 تانى) … نسب الامية انخفضت من 63% للسيدات الى 42%…..اغلب الشعب المصري فقير بقاله 7000 سنة. حد يقولى امتى كان الشعب المصرى غنى ؟!
= الادعاء :حيقولك “انا نزلت التحرير ومقبضتش ومش عميل وغيرى كتير”
= الحقيقة : فعلا انت نزلت وكانت نواياك كويسه وعاوز البلد تتقدم … بس انت استغلوك … هل انت خططت للمؤامرة ؟ هل حكمت انت البلد ؟ انت كنت مجرد اداه استغلوا غضبك واحلامك لتحقيق خطتهم … ومش معنى ان نزل ناس كويسه انها مش مؤامرة …
= الادعاء : لولا ثورة يناير مكنتش انت كتبت كده
= الحقيقة : متقوليش ان قبل مؤامرة يناير مكناش بنتكلم بحرية … متضحكش على نفسك وتصدق حواديت زوار الفجر والهرى ده … ده ممكن يكون حصل من 50 سنة ! …
= الادعاء : ثورة يناير هى “العيش – الحرية – العدالة الاجتماعية”
الحقيقة : مؤامرة يناير هى الخراب واتحداك ان تطلع ليا واحد بس فى مصر استفاد من النكسة بخلاف البلطجية .
= الادعاء : ثورة يناير كانت ثورة طاهرة حتى سرقها الفلول والاخوان
= الحقيقة : دى اتخطط لها فى البنتاجون فى 2005 وفى المخابرات الامريكية فى 2006 و اتدرب الناشطين عليها فى صربيا فى 2010 … محدش سرق حاجة .. دى خطتهم ونفذوها.
= الادعاء : الثورة لم تحكم
الحقيقة : لأ اللى خطط لها وعمل المؤامرة حكم مصر لمده عام حتى ظهرت نواياهم وتم القضاء عليهم
= الادعاء :متحكمش بسرعة كده … الثورات بتبان نتيجتها بعد عشرات السنين
= الحقيقة : يا خبر اسود … ده فى سنة واحدة بس مصر خربت … لو كانوا استنوا سنه تانية كمان .. كنا انتهينا للابد
= الادعاء : لولا ثورة يناير مكنش السيسي حيحكم
= الحقيقة : الرئيس اللى جابته مجيدة كان الطرطور محمد مرسي واللى كان بيحكم كان الشاطر … اللى جاب السيسي هى ثورة 30 يونيو.
= الادعاء : انت فلول ومن ابناء مبارك وملكش كرامة وتستحق حبيب العادلى!
= الحقيقة : يشرفنى ان اكون فلول مانضحكش عليا باسم الدين او الثورة
……….. وبرضه مش حيقتنعوا لانها مش مسألة حقائق وادلة … ده انكار انه اتضحك عليهم
