كتب:حسام داود
كل ذنبى إنى مصرى
يعنى الظلم فيا حصرى
ظلم البلد على كل لون
بالقانون وبشكل عصرى
يعنى بالمقلوب بعيش
أدوق الذل وماشتكيش
ولما انادى وأقول كرامه
الحكومه تقول مفيش
ماشيه معانا خلف خلاف
حمايتك معناها إنك تخاف
بتبقى للى سارقها وردى
وعلى الغلبان سنين عجاف
بلسم هى للجروح لكل ظالم
والمظلوم يتجيبله الجفاف
ولو هتحن عليه فى يوم
بتيجى برد فى وقت صيف
او ربيع فى وقت الخريف
يعنى تدى للبردان رغيف
والجعان تديه لحاف
القصد ماشيه معانا بالعكس
نبوس إديها وتدينا بالبوكس
و تركب وشها الخشب للغلابه
ومع الكبار عايشاها هجس
اصل القضيه بجد محسومه
إحنا مالناش حظ فى أى حكومه
بتظلم فينا ولما مره نشتكيها
بتطلع دايما هى اللى مظلومه
ولما نشتكى حرمان حنانها
برده تطلع هى اللى محرومه
يعنى م الأخر العلبه فيها إيه
العلبه فيها فيل كبير بزلومه
