بقلم : حمدي الجزار
في لحظة كده حبيت أعلق على بعض التصرفات الأخلاقية المستحدثة في مجتمعنا وقولت مع نفسي أكتب مقال صغير كده وبعدين قولت أكتبه بإسلوب سلسلة مقالات الشعب الحشري أحسن لأن الكلام اللي هقوله لازم كل واحد يفهمه كده ببساطة ،،
قال أيه بقى السنة دي مات كده ييجي سبعة أو ثمانية فنانين قولنا أعمارهم ومحدش هيموت ناقص عمر هم الفنانين أيه يعني أهم ينتموا لفصيل البشر والخلق وليهم عمر محدود عند المولى عز وجل ،،كل ده عادي بس اللي مش عادي بقى أننا نسمع بقى شوية فتاوي من شوية قليلة من الشعب الحشري قال أيه معرفشي مين مات ده ربنا هيدخله جهنم حدف وأسمها أيه برضوا اللي ماتت هتكون عبره لغيرها من الفنانات علشان يعرفوا أن النار منتظراهم هم وأمثالهم ،وأن فلان ده أن شاء الله ربنا هيرحمه ليه هو كان عمل أيه غير البوس والأحضان وأيشي أيه وأبصر أيه في أفلامه أو أفلامها وليعوذوا بالله وان كل حاجة أخوانا البعدا المفتيين اللي على الفيس بوك والبتاع التاني ده تويتر بقوا خلاص من رجال الفتوى ،، يا أخي إنتوا وهو جاتكوا ستين داهية تاخدكوا وتاخد أشكالكم العكرة سيبتوا كل حاجة وبقيتوا تدخلوا الجنة والنار بمزاجكم بقيتوا حتى عارفين وأعوذ بالله اللي ربنا هيعملوا في الآخرة أن هيدخل ده النار ودي أسفل السافلين وأن ده هيدخل الجنة ،، نهاركم اسود زي وشوشكم وبتقولوا كده وجاتلكم الجرأة تتكلموا عن الجنة والنار كده بسهولة وبتعتبوا على الفنانين أنهم عملوا شوية مشاهد فيه شوية قلة حيا ،، بس يا أبن الفالحة أنت وهو وهي الفنانين مقدروش ييجوا ويتكلموا في الآخرة والعذاب والثواب والعقاب ،،وبعدين نسيتوا أن ربنا غفور ورحيم ولو جاء أبن آدم ملئ البحر خطايا من غير شرك وكفر تاب الله عليه ،،ونسيتوا أن علاقة العبد وربه لا يعلمها إلا ربه ياناس ياهوووووووووا كفاية بقى تدخل فيما لا يعنينا وده مش أي تدخل دي علاقة الرحمن الرحيم بعباده ملكوش دعوة يا شوية حشريين وأذكروا محاسن مواتكم ،
وبعدين نطلع بقى بشوية كلام فاضي تاني وقلة أدب وأسلوب مستفز ونحشر نفسنا في علاقة ممثل بيجوز على سنة الله ورسوله أمام الناس كلها يعني الراجل داخل البيت من بابه وفي الحلال أهو بس نقول أيه بقى نسيبه في حاله لا إزاي لازم نحشر مناخيرنا حتى في الحلال كمان ونطلع فيه العيوب المستخبية قال أيه دي العروسة من عمر بنته وأصله كبير عليها وأصل مش عارف أيه ولا أيه ونكدتوا على الراجل في ليلة حلوة بالنسبالهم وكلام وشتيمه وأسلوب قذر نكتبه على صفحات النت والنتوت وصور مش عارف عاملة ازاي
ونسيت يا أخويا أنت وهو وهي البلاوي اللي كانوا عاملين فيها أنهم رجال الدين الوحيدين اللي في البلد أن أغلبهم وخاصة كبار السن كانوا متجوزين من بنات في عمر أحفادهم مش بناتهم وكانوا بيقولوا ده جواز على سنة الله ورسوله أسوة بحبيبنا محمد والصحابة والتابعين ولا ده كان حلو ليهم علشان بذقون وعيب للراجل علشان فنان ،
أيه اللي جرى يامصريين مكنتشي دي أخلاقنا ولا طباعنا ولا أسلوبنا .
جري أيه يا شعب يا حشري صحيح أحنا حشريين بس الكلام ده مينفعشي يتقال ولا ينعاد لأنه كلام في الدين والأخلاق .
جرالنا أيه يا ولاد مالنا كده نسينا كل الحلو والزمن الحلو وبقينا نأكل في بعض ونأكل لحم أخواتنا ميتاً ومستحليين كمان لحمه ،
جرالنا أيه بقينا نحشر نفسنا في اللي ملناش فيه ،
يا أخوانا حرام عليكم ودعوا الخلق للخالق ..
