ياوزير التموين دخلت على الإنترنت لتعديل بطاقة التموين لتحديثها حسب أوامر سيادتك أكتر من 10 مرات منفعش وحسب تعليماتك ذهبت لمكتب التموين الخاص بي 3 مرات ووقفت طوابير ماشاء الله وبعد ما وصلت للمختص بالسلامه قال لي وهعملك إيه مينفعش .. سألت عن البيه المسؤول طلع البيه المسؤول مش موجود ومزوغ وهو بسلامته المسؤول عن الكومبيوتر .. رحت كمان مره تانى يوم وبرضه البيه مش موجود مزوغ والطوابير ماشاء الله وبعد ما وصلت بالسلامه للمسؤوليين نصحونى أذهب للسيبر خارج مبنى التموين وأدفع وهما هيعدلوا لي البطاقة ويحدثوها .. رحت للسيبر لقيت طابور ميقلش عن 10 متر ويقولك أصل السيستم واقع .
يا معالي الوزير وعلى ما أقول ربي شهيد شفت بأم عينى معظم اللي واقفين في الطوابير أقسم لك بالل ناس غلابه فوق ال 70 سنه أهاليهم شيلنهم يا أما مسندنهم معظمهم بجلاليب وشباشب مقطعه معظمهم قرب يموت والله نسيت البطاقة بتاعتى وبقت شغلتى أشيل ده وأسند ده وأجيب كرسي لده وأأقعد أملي وأكتب الإستمارات لده وده وفي الأخر قالوا لي المسؤولين البهوات تعالي لنا يوم 30 /09/2018 يعنى أخر الشهر طيب ليه محدش عارف.
معالى الوزير حرام عليكم كفايه زل في الناس كفايه بهدله في خلق الله الغلابه ياريت سيادتك تبعت اى مسؤول ينزل يشوف بعينه قهر وذل الناس الغلابه المسنين والمرضي اللي بقوا شحاتين يشوفوا إيه موضوع السيبر الخاص أبو فلوس اللي بيحدث البطاقات خارج التموين يشوفوا المسؤولين المزوغين يشوفوا البهوات اللي واقفين يبيعوا الإستمارات الخاصة بالتموين.
بالمناسبة هذا المكتب عنوانه كالأتى:-
القاهرة – بحى شبرا – شارع الترعة البولاقية – مكتب تموين الساحل داخل جراج أتوبيسات الترعة .. وبالمناسبه البهوات الموظفين مبيشتغلوش قبل الساعة 10 صباحاً.
سيدى الوزير للأسف يوم الأحد القادم مضطر لعمل محضر رسمى بقسم الساحل بهذه الواقعه وإثباتها حفاظاً لحقي كمواطن هذا إذا كنتوا بتعتبروا هذا الشعب من جنس البنى آدمين.
