شعر : دكتورة سماح إسماعيل
الخوف بيقتل جوا قلبك
أحلى حاجة عرفتها ..
هفضل أغنيك ف القصايد
ويسألوك: بتحبها؟!!
كان نفسي لما تكون هناك
أكون معاك
أمسك بدالك ميكرفون
وبكل جرأة أو جنون
أعلن :
“حياتي ملكها ..
ادعولي هي تحبني
وماكونش بس قصيدة تايه
في دواوين شعرها ”
الخوف بيقتل جوا روحك
أحلى حاجة ملكتها
أنا كنت بكتبلك قصايد
وحكايات …
لا عمري مرة عشتها
ولا شوفتها ..
طول ما إنت خايف تعترف
الخوف هيسرق ضحكتك
وتقول ياااااارتني ضحكتها
