((**(( الحياة كلمة ))**))

لو حبيت تقول كلمة ،
اختار الودن اللى تسمع قبل ماتختار الكلمة ..
وخلى اللى ف قلبك على لسانك ،
واوعى تزوق كلمة ..
قولها زى ما انت حاسسها ،
وهى فى الآخر كلمة ..
فان طلعت الكلمةغلط مش عيب تعتذر ،
والاعتذار برضه كلمة ..
بس خد بالك لو اللى بيسمعك فى قلبه حب ،
حيسمعك بحب ويعدى الكلمة ..
لكن لو ضميره كده والا كده ، اجارك الله ،
الكلمة حتبقى مليووووون كلمة ..
لكن اوعى تنسى ان الحب كلمة..
والكره كلمة ..
والحياة كلمة ..
والموت كلمة ..
وربنا لما خلق الكون خلقه بكلمة ” كن ” ..
يعنى برضه كلمة ..
لكن اكيد فيه كلمة بتختلف عن كلمة ..
فخد بالك قوى قوى ..
لان سيرتك بعدك ،
برضه حتبقى كلمة ..