الاعلاميه وسام خاطر تكتب , العالم الآخر

 نفسي اعيش حياتي افرح واضحك واطنطط.

اجري واتفسح. بس للاسف مفيش وقت.

كله شغل وتعب وارهاق وبعد وعتاب وزعل.

طب ايه الحياة هتتعاش امتي وفين ومع مين؟

كل دي اسئلة بنفكر فيها طول الوقت.

مشين بنجري ورا احلامنا لا عارفين نوصل ولا عارفين نقف.

دنيا ودايرة. ناس تخطف وتسرق وناس تشقي وتتعب

وناس تحب وتفارق وناس تايهه بين المفارق.

علامات متسابة علي الوشوش دا بيضحك ودا بيدوس

وواحد تاني بيندب حظه اصل لسه مجاش عليه الدور.

وواحدة قاعدة مستنية النصيب او الحبيب او عيل بعد طول انتظار.

واطفال موجودة في الشبابيك بتتفرج علي الماشين واحد نايم والتاني قايم.

هو ياتري هانعيش حياتنا امتي. جيت هي وهو وقالوا هانعيشها زي ماهي.

بس الوجع مهانش عليه الفرح يعدي لباب بيتها.

ردت وقالت طب عاوزة اعيش حياتي ردوا عليها

وقالوا كان غيرك اشطر. بكره ياشطرة ايوة انتي ياقطة تكبر وتعجزي وتموتي.

بصت باستغراب وقالت طب وحبيبي! مش هاعيش معاه؟

قالوا في العالم الاخر يمكن يكون ليكي نصيب تعيشي ويا الحبيب.

غمضت عيونها وهي بتبكي ومن كتر الوجع والالم.

بس للاسف سكت جواها الكلام بعد كل اللي كان.