انا قررت
كلمة صعب نقولها الا لو فعلا كنا اخدنا قرار ترددنا فيه كتير وكان من الصعب ويمكن المستحيل اننا ناخده.
طول الوقت بنقول انا هاعمل، انا هاخرج، انا هاشتري، انا هابيع، انا هارجع، انا هنام، انا هاكل.
بس في وسط كل ده قليل لو قلت انا قررت. القرار بيكون صعب علينا.
يمكن علشان بنكون عارفين ان كل شئ هايحصل بعد القرار ده هايكون احنا اللي حددنا ولازم نتحمل نتيجته.
او علشان طول الوقت مش حابين نحاسب نفسنا علي قراراتنا وبنرمي اللوم علي غيرنا
. علشان كده طول الوقت لسانه مش بينطق بكلمة انا قررت. بيحاول عقلنا انه يتحايل علينا ارضاء لنفسنا.
علشان نكون مرتاحين. وبالعكس تمام برده بنفضل محتارين. القرار اوقات كتير بيكون صدمة لواقع عيشينه وبنحاول نغيره. للأحسن وساعات كمان بيكون للأسوأ. بس ياتري كام واحد فينا عنده الجرأة انه ياخد القرار ويقول انا قررت.
مين فينا هايقول انا قررت انسي الماضي اللي وجعني،
انا قررت اصلح حاضر انا عايشه، او قررت ابعد عن شخص وجعني وقهرني،
او يمكن قررت ابتسم في وش كل جرح يقابلني، انا قررت اسخر الحاضر لسعادتي مهما كانت الظروف،
واحلم ببكره مليان خير وسعادة وحب، او قررت اتخلي عن حلم دمر حياتي،
او قررت افصل حلم علي قدي ينفع يتحقق. اصل مش الاحلام متاحة.
او يقول انا قررت اشتغل الشغل ده وهانجح فيه وهاكون من افضل رواده،
او يمكن قررت اني لازم اقرر اني اخد قرار،
قررت اني مبقاش تاني سلبي وانطوائي وانسان سليط او يمكن سخيف،
انا قررت احكم مشاعري في الفرح والحزن كمان. قرروا أن مفيش حد يفرط عليكم حياة انتم مش عاوزينها،
قرروا تنجحوا وتفرحوا وتبسطوا اللي حواليكم، قرروا انكم مش هاتجرحوا ولا تخونوا ولا تكونوا مش قد المسؤولية،
قرروا تكونوا قدم الكلمة اللي بتقولها. مش لازم علشان نلتزم نكون كتبين كلمنا في عقود وورق.
مين فينا هايقول انا قررت..
